निदँया दुने कन्या मन्दिरया न्हूगु छेँ

येँ– स्वदँ न्ह्यःया तःभुखाचं स्यंगु न्ह्यःखाय् च्वंगु कन्या मन्दिर मा.वि. ब्वनेकुथिया छेँया पुनःनिर्माण जुइगु जूगु दु । शुक्रबाः छगू ज्याझ्वःया दथुइ अमेरिकी राजदूत, येँ महनागरपालिकाया मेयर विद्यासुन्दर शाक्य, येँ क्षेत्र नं. ७ या सांसद रामवीर मानन्धर, पुनर्निमाण प्राधिकरणया सिइओ युवराज भुसाल व यूएसएआइडीया डाइरेक्टरं मंकाः कथं भवनया शिलान्यास यानादीगु दु ।

यूएसएआइडी ग्वाहालि भवन पुनर्निर्माण जुइत्यंगु खः । ब्वनेकुथिया भवन निदँ दुने दयेके क्वचायेकेगु ग्वसाः दु । कन्यामन्दिर मा.वि.या प्रिन्सिपल नगेन्द्रबहादुर विष्टं लसकुस यानादीगु ज्याझ्वलय् येँमपा १७ वडा अध्यक्ष नविन मानन्धर, १८ वडा अध्यक्ष न्हुछेकाजी महर्जन २५ वडाया अध्यक्ष निलकाजी शाक्य लगायत स्थानीय व्यक्तिपिनिगु उपस्थिति दुगु खः । ज्याझ्वःया सभापतित्व व्यवस्थापन समितिया अध्यक्ष कमलनाथ मिश्रं यानादीगु खः ।

यूएसएआइडीं भुखाचं स्यंगु थीथी स्कुलत दयेकेगु झ्वलय् २००३ सालय् स्थापना जूगु थुगु ऐतिहासिक स्कुल दकलय् न्हापां दयेकेत्यंगु खः ।