ने. सं. ११४३ तछलाथ्व दशमी -

कोरोनां स्वनिगःया अर्थतन्त्रय् लाकूगु प्रभाव : खाली जुजुं वन थँबहीया पसः

येँ – कोरोना भाइरसया संक्रमण लिपा थँबहीया पर्यटन व्यवसाय पूर्ण रुपं प्रभावित जूगु दु । नेपालय् कोरोना भाइरस नियन्त्रणया निंतिं सरकारं लकडाउन याःगु निला लिपां निसें अन दुगु गुलिखे पसः त्वःतेगु क्रम शुरु जूगु पर्यटन व्यवसायी कुमार खड्गी ‘नेपालभाषा टाइम्स’ यात कनादिल ।

वय्कःया कथं अप्वः बाः पुलेमाःगु आपालं पसः बन्द जुइधुंकूगु दु । स्वला दयेधुंकाः नं कोरोनाया संक्रमण झन तच्वया वनेवं व्यापारीतय्सं पसः धमाधम पसः त्वःताहःगु खँ वय्कलं कनादीगु दु । वय्कःया कथं ट्रेकिङ वनेत माःगु ज्वलं मीगु, बालं बीगु छगू हे ब्राण्डया प्यंगू न्यागू आउलेट दुगु आपालं पसः फुक्कं धयाथें बन्द यानाहःगु दु ।

ट्रेकिङ सम्बन्धी सामग्री मीगु शेर्पा आउटडोर निसें तःतःधंगु अज्याःगु पसः बन्द जुयाच्वंगु दुसा अन दुगु हटब्रेड नं बन्द यायेधुंकूगु दु । कोरोनाया संक्रमण म्हो जूसां नं पर्यटक वयेत थप दछि ई काइगु जुयाः व्यापारीतय्सं पसः त्वते गु क्रम अप्वया वंगु खः । भाजु खड्गीं धयादी, ‘थ्व जिगु पसः नं आः गुलि तक बाः जक पुलाः च्वनेगु खः ? थ्व लछि स्वये वयां मजिल धाःसा पसः त्वःतेगुया विकल्प मदु ।’

थँबहीलय् छगू तःधंगु पसःया बाः म्होति नं लछिया निगू निसें स्वंगू लाख तका तक पुलेमाः । अप्वः यानाः ट्रेकिङ वनेगु सामग्री मीगु व कार्पेट पसःयात तःकूगु पसःया आवश्यक जुइ । थौंकन्हय् पसः त्वःता हयाच्वंगु अप्वः थें थज्याः हे पसः जुयाच्वंगु दु ।

अथे हे मेम्ह व्यापारी श्रीकृष्ण महर्जनं नं थँबही लागाय् दुगु आपालं कार्गो, ट्रेकिङ लगायत थीथी कथंया पसः बन्द यायेगु क्रम अप्वया वनाच्वंगु जानकारी बियादीगु दु । वय्कलं नं व्यापारीतय्सं बाः पुलेफइगु अवस्था मदयावंलिसे पसः त्वःता वनाच्वंगु खँ कनादिल ।

थौंकन्हय् नं अन न्हिं नीगूति पसः चायेकेगु जुयाच्वंगु दु, तर पर्यटक छम्ह हे मदुगुलिं व्यापारीत थःथवय् गफ यानाः पसः तिनाः वनेगु यानाच्वंगु दु । व्यापार मजुयाः पसः बाः पुलेत थाकुया वयेवं पसल्याः व घरपति दथुइ बाः क्वकायेगु धयागु खँ वयाच्वंसां नं उकियात कयाः ठोस निर्णय धाःसा जुइफया मदुनि । थबहीया हे मेम्ह पर्यटन व्यवसायी प्रदीप शाहीं धयादी, ‘खँ ला जुयाच्वंगु दु, तर आधिकारीक रुपं खँ वयाच्वंगु मदु ।’ थँबहीया आपालं व्यापारीतय्सं घरपतिं थःपिंत छुं भचा सहुलियत बीमाःगु माग यानाच्वंगु दुसां आधिकारीक रुपं धायेत समस्या जुयाच्वंगु दु ।

पसल्याःतय्त सहुलियत बीत छुं छुं घरपतित सकारात्मक दुसा छुं छुं घरपति धाःसातयार मजुयाच्वंगु व्यवसायीतय् धापू दु । भाजु शाहीं धयादिल, ‘फुक्कं घरपति अथे हे जुइमखु, अथे जुयाः आः थथे घरपतिं छुट बी वा बीमखु धायेफइगु अवस्था मदु ।’

उकथं सुइन्यादँ न्ह्यः निसें थँबहीलय् थान्का व्यापार यानाच्वम्ह छम्ह नां कने मयःम्ह पर्यटन व्यवसायींनं थौंकन्हय् अवस्था खनाः थः नं पसः त्वःतेगु मनस्थितिइ दुगु खँ कनादिल । ‘घरपति व पसल्याः दथुइ बाःया गुगु विवाद दु, थ्व समस्या ज्यनीगु सम्भावना मदु,’ वय्कलं धयादी, ‘सरकारं हे थुकियात कयाः चिउताः प्वंकूसा जक खः, मखुसा बाः छुट बीगु गुगुं नं सम्भावना मदु ।’

ठमेल पर्यटन विकास परिषदं पसल्याः व घरपतिया दथुइ सहमति याकेगु कुतः यानाच्वंगु खःसां नं अज्याःगु कुतः ताः लाइगु सम्भावना नं म्हो जक दुगु खँ उम्ह व्यापारी कनादीगु दु ।