‘आः पार्टी दुने हे च्वनाः संघर्ष’
येँ – बागमति प्रदेशया सांसद डा. अजयक्रान्ति शाक्यं प्रदेश नं. ३ या नां नेपालमण्डल तयेगु सम्भव हे मदुगु खःसां थःपिंत फक्व कुतः यानागु खँ धयादीगु दु । नेवाः पत्रकार राष्ट्रिय दबूया न्हूपिं पदाधिकारीपिंत भिंतुना बीगु ज्याझ्वलय् न्ववासें सांसद शाक्यं धयादिल, ‘प्रदेशया नां ‘नेपालमण्डल’ तये फइगु सम्भावना मदु धयागु जिमिसं न्हापा हे सिउ, अथे खःसां झीसं थःगु पहिचानया निंतिं कुतः यायेमाः धकाः माननीयपिं राजेश शाक्य, बसन्त मानन्धर लगायत जानाः जिमिसं अन्तिम इलय् तकं थुकिया निंतिं कुतः यानागु खः ।’
थःपिनिगु पार्टी नेकपापाखें बागमति नां हे तयेत ह्वीप जारी याये धुंकाः थःपिंत ‘नेपालमण्डल’ नां दर्ता यायेगु निंतिं आवश्यक मनू तकं मगाःगु खँ न्ह्यथँसें वय्कलं नेपाल मण्डलया नां तकं दर्ता मजुइगु अवस्थाय् थःपिंसं राजीनामा बीगु मनस्थिति दयेकागु खःसां नेवाः न्ह्यलुवापिनिगु हे सुझाव कथं राजीनामा मबियागु खँ नं धयादिल । ‘जिमिसं राजीनामा बीगु मनस्थिति दयेकाः हेटौंडां हे नेवाः न्ह्यलुवालिसें थीथी व्यक्तित्वपिंत फोन यानाः धयागु खः, तर वय्कःपिंसं राज्य संयन्त्र दुने च्वनाः हे झीगु सः थ्वयेका च्वने माः, उकिं राजीनामा बीगु गल्ती याये मजिउगु सुझाव बियादिल’ वय्कलं थःपिंसं राजीनामा मबियागु कारण बारे स्पष्ट यासें धयादिल । थः राजनीतिइ वयागु हे राज्य सत्ता दुने च्वनाः संघर्ष याये माः धयागु ल्याखं खः धासें वय्कलं आः नं नेवाःतय् पहिचान ल्यंके गु निंतिं संघर्ष हे यानाच्वने गु खँ धयादिल ।
ज्याझ्वलय् न्ववानादिसें मेम्ह सांसद राजेश शाक्यं नेवाः पत्रकार राष्ट्रिय दबूया विकासया निंतिं थःपिंसं फूचाःगु ग्वाहालि यायेगु खँ धयादिसें प्रदेश सरकारय् नं दबूया थीथी ज्याझ्वःया निंतिं खँ यंके धुनागु जानकारी बियादिल । ज्याझ्वलय् न्ववानादिसें पत्रकार दबूया केन्द्रीय नायः सुरजवीर वज्राचार्य, वरिष्ठ न्वकु नृपेन्द्रलाल श्रेष्ठ व महासचिव सुनिल महर्जनपिंसं नेवाःतय् अधिकार या निंतिं दबुलिं सः थ्वयेका वयाच्वनी धासें थुकिया निंतिं सांसदपिनिपाखें नं ग्वाहालि जुइगु आशा प्वंकादीगु खः ।
LEAVE YOUR COMMENTS