थौं ओली व चन्दया मंकाः सभा

येँ (नेपालभाषा टाइम्स)नेकपा विप्लव पुचःया महासचिव नेत्रविक्रम चन्द थौं सार्वजनिक जुइत्यंगु दु । म्हिगः सरकार व विप्लव पार्टी दथुइ स्वंगू बुँदे सहमति जुइधुंकाः प्रधानमन्त्री केपी ओली व विप्लव छगू हे दबुली दनाः सरकार व नेकपा दथुइ जूगु सहमति सार्वजनिक यायेत्यंगु खः ।

वंगु बुधवाःनिसें सरकार व चन्द पुचः दथुइ वार्ता जूगु खः । वार्ताय् चन्द पुचः हिंसात्मक लँपु त्वःताः शान्तिपूर्ण राजनीतिइ वयेत तयार जूगु खः । थौंया सभाय् थ्वहे खँ घोषणा जुइगु खँ धाःगु दु ।

सरकारपाखें विप्लव पार्टीयात तयातःगु प्रतिबन्ध चीकेगु, बन्दीत त्वःतेगु व मुद्दा खारेज यायेगु सहमति याःगु खः । वंगु निला न्ह्यः सरकारं विप्लव पुचःया राजनीतिक गतिविधिइ प्रतिबन्ध तःगु खः । चन्द पुचःयात प्रतिबन्ध तये न्ह्यः सरकारं सोमप्रसाद पाण्डेया नेतृत्वय् सरकारी वार्ता पुचः गठन याःगु खःसा चन्द पुचः वार्ता यायेत तयार मजुइवं सरकारी वार्ता पुचः नं भंग जूगु खः ।

तर आः वयाः चन्द पुचः सरकारलिसे वार्ता यायेगु निंतिं गुकथं तयार जुल धइगु बारे धाःसा थीथी न्ह्यसः ब्वलनाच्वंगु दु । सरकार व चन्द पुचलं वार्ताया वातावरण तयार जूगु बारे छुं खँ स्पष्ट यानाच्वंगु मदु । तर थौं जुइगु सार्वजनिक ज्याझ्वलय् उकिया बारे नं लिसः वइगु अपेक्षा यानातःगु दु ।

सरकारं चन्द पुचःयात प्रतिबन्ध तयेधुंकाः निद्वः स्वयां अप्वः चन्दया कार्यकर्तात ज्वनेधुंकूगुलिं नं चन्द पुचः वार्ताया माध्यमं खुल्ला राजनीतिइ वयेत तयार जूगु विश्लेषण यानाहःगु दु । थ्वहे झ्वलय् सीदुगु कथं विप्लवयात हयेगु निंतिं सरकारं निजी क्षेत्रया छगः हेलिकप्टर स्टाण्डबाइ तयातःगु दु ।