गुथि विधेयक बारे गलत धारणा
गुथि विधेयक बारे नेपाल मजदुर किसान पार्टीं गलत धारणा न्ह्यःने हःगु दु । उगु पार्टीं गुथिया जग्गायात रेकर्ड यायेगु अधिकार कायम जुइमाः धासें सकल नेवाःतय् विरुद्ध थःपिनिगु धारणा न्ह्यःने हःगु दु । म्हिगः तक थीथी गुथिइ जने जुयाच्वंगु जग्गा जमीनया आधारय् हे येँया यँयाः जात्रा, यलया बुंगद्यःया जात्रा व ख्वपया बिस्काः जात्रा सुचारु जुयाच्वंगु खः ।
आः उगु जात्रायात विस्थापित यायेगु कथं नेमकिपाया धारणा न्ह्यःने वःगु दु । छगू ल्याखं जमीन जोत्नेको धाःगु नारा प्रगतिशील नारा खः । व आदर्श नारा नं खः । गुम्हेसिनं दुःख सियाच्वंगु दइ वयागु नामय् हे जमीन दत धाःसा व थेंज्याःगु उपलब्धी गन माःवनेगु ? नेमकिपां ताः ई न्ह्यवंनिसें हे जमीन गुम्हेसियां जोत याइ, वयागु हे जुइमाः धइगु नारा लगे यानाः ख्वप देय्यात थःपिनिगु कब्जाय् कयातःगु दु ।
अन शासक जुइमाःपिं सुं दुसा उगु हे नारायात थःपिनिगु आदर्श तायेकाः ज्या यानाः थःपिंसं सयेकागु उब्जनी थःपिंत हे दयेमाःगु खँय् प्रतिबद्ध जूपिं हे जक थःपिनि शासक जुयाच्वंगु दु । प्रेम सुवाल, बुद्धिकुमार गोसाइँ, सुनिल प्रजापति, ज्ञानबहादुर न्याइच्याइँ व गोबिन्द दुवाल अज्याःपिं हे किसान नेतात खः, गुम्हेसिनं जमीन जोत्नेको धाधां हे थःपिनिगु जमीन मेपिंसं लाका नं उगु नारायात सुधार यायेत धाःसा मस्वः ।
म्हिगः तक प्रेम सुवालया गुलि जमीन दुगु खः आः मंत, अथेहे प्रत्येक नेतातय् जमीन पिनं वःपिंसं लाकाः नयाच्वंगु दु । अथे जुयाः नं जमीन जोत्नेको नाराय् धाःसा हिउपाः वःगु खनेमदु । थ्व इलय् सामन्ती व्यवस्थाया अन्त्य व गणतान्त्रिक व्यवस्था लागू जुयाच्वंगु दु । तर जमीन जोत्नेको धाःगु नेमकिपाया नाराय् हिउगु वःगु मदुनिसा जमीन जोत्नेको मखु कि जमीन सरकारको जूवंगु दु ।
थ्व धइगु सामन्ती संस्कार वनाः नं झी दथुइ सामन्ती संस्कार ल्यनाच्वंगुया छगू दसु खः । अथे धइगु नारायणमान बिजुक्छेँ रोहितं धाःथें सामन्ती व्यवस्था सिनानं सामन्ती अवशेष ल्यनाच्वंगु खः, वा सर्प सिना वंसा सर्पया न्हिप्यं सनाच्वं थें खः । सामन्ती व्यवस्था, सामन्ती संस्कार मदयेकेगु निंतिं देसय् २०६२÷६३ सालय् तःधंगु आन्दोलन जुलं नं उकियात समूल नष्ट धाःसा यायेफुगु मदुनि ।
जग्गाया भरय् जात्रा चले यायेमाःगु गुथि, संघ संस्था वा धल्चा भजनया लागिं धाःसा बाली मवयेवं जात्रा पर्व चले यायेत बाध्य धाःसा मजुल । उकिं थ्व इलय् नेमकिपां थ्वयेका च्वंगु जमीन जोत्नेको नाराय् हिउपाः वयेमाः ।
थ्व अवशेष ल्यनाच्वंगु प्रमाण धइगु गुथि जग्गायात गुथिइ हे लित बीगु पलेसा सरकारयात लित बीकेगु कथं हःगु वर्तमान विधेयक नं खः । छगू ल्याखं सामन्ती अवशेष ल्यना च्वनेमाः धइगु ल्याखं सामन्ती कालय्् गथे गुथि जग्गा मार्फत् सरकार चले जुयाच्वंगु खः, आः नं उगु हे जग्गा मार्फत् सरकार चले यायेगु निंतिं गुथिया जग्गा जमीनयात सरकारं थःपिनि मातहतय् तयाः मीगु, न्यायेगु नापं कालबिल यायेगु व्यवस्था कायम याना तयेत स्वःगु दु ।
आः अथे याये दइ मखु धकाः सारा नेवाःत दनावःगु दु । तर नेवाःतय् धारणा व विचार अःखः नेपाल मजदुर किसान पार्टीं धाःसा जग्गा जोत्नेको धयाः प्रगतिशील नारा ध्वयेकागु नामय् जनतायात अधिकारं बञ्चित यायेत स्वयाच्वंगु दु । थ्व धइगु सामन्ती संस्कार हे खः ।
खय्त ला छगू इलय् जुजु मदयेका छ्वयेमाः धकाः सारा जनतां नारा थ्वयेकूगु इलय् नं नेमकिपा व उगु पार्टीया अध्यक्ष नारायणमान बिजुक्छेँ रोहितं धाःसा थ्व इलय् थःपिनिगु उच्च शक्ति प्राप्त मजुइकं सामन्ती व्यवस्थाया नाइके जुजुयात चीकेगु ज्या गलत फुइफु धयादीगु खः । थ्व २०६२÷६३ सालया जनआन्दोलनया ईया खँ खः ।
आः वयाः नं सामन्ती अवशेष ल्यंका तयेगु धारणा न्ह्यब्वयेगु ज्या नेमकिपां यानाच्वंगु दु । म्हिगः निजी सम्पत्तियात ल्यंकाः दान याना नं फल्चा ल्ह्वनेत, हितिगः ल्ह्वनेत, अले गुथिया झारा वनेगु धकाः थीथी कथंया सामाजिक ज्या यायेत गुथि नीस्वनातःगु खः । उकियात ग्वाहालि यायेगु कथं दातात जानाः निजी गुथि कथं जग्गा जमीन दान यानातःगु खः ।
तर आः वयाः जग्गा दलाल व भू माफियातय् चलखेलया कारणं अज्याःगु दोहोरो नामय् लानाच्वंगु वा गुथिया जग्गात धमाधम ब्यक्तिया नामय् न्यायेगु मीगु ज्या जुयाच्वंगु दु । थ्व गलत परिपाटी खः । थःपिंके जग्गा जमीन दतलय् जक उगु जग्गापाखें वःगु बालीपाखें बिस्काः जात्रा, येँयाः जात्रा व कुमारी जात्रा अले बुंगद्यःया जात्रा सुथांलाक्क न्ह्यानाच्व.गु खः ।
तर आः अथे मखेधुंकल । जग्गा फुक्कं रैटानीइ कायम जुइधुंकाः जग्गा यानाच्वंपिंसं जग्गाया बाली बुुझे यायेगु ज्या मयाये धुंकल । गुकिं यानाः उगु बालीया भरय् चले जुयाच्वंगु त्वाःत्वालय्या जात्रापात्रा व नखः चखःत फुक्कं लोप जुइगु स्थिति दु । जमीन जोत्नेको नारा गलत मखयेफु । तर गुथि जग्गाया हकय् धाःसा व गलत साबित जूवंगु दु ।
जमीन यदि जोत यानाच्वंम्हेसिया नां जूवन धाःसा वं आः जोते याइ मखुत । जोत यायेगु पलेसा मिया उगु दामं वा ध्यबां ब्यापार ब्यवसाय चले यायेफु । जमीन जोते याइम्हेसिगु नामय् लात धाःसा उगु जग्गा मी नं जीगु जुल । न्ह्याम्हेसियां न्याये नं जिइगु जुल ।
अले पश्चिम १ नम्बर क्षेत्रंनिसें पूर्व ६ नम्बर क्षेत्रयापिं खय् ब्रम्हूत थन वयाः झीगु उगु जग्गा जमीन न्यानाः थनया सिमिगालय्यात हङकङ मार्केट, तःपा दम्फोयात वाइसेल मार्ग व च्वकंतिलायात चोकिन चिल्ला याना चिकेन चिल्ली दयेका नइगु दिन वइगु अवश्य जुल ।
जमीन जोत्नेको नारा प्रगतिशील जुइफु ।
किसानं भूमि जोते यानाच्वंगु ल्याखं मत छक्वः अप्वः कायेत व नारा सार्थक नं जुइफु । तर उगु हे जमीनपाखें उम्ह किसानं बाली पूगुया लिधंसाय् भैलःद्यःया सच्छि व नीगू पर्व चले यायेमाःगु, तलेजुया न्हिया न्हिथंया ३६५ गू नखः चखः व पर्व क्वचायेकेमाःगु व बिस्काः जात्राया भैलःखः सालेमाःगु खँ नं नेमकिपां विचाः यायेमाः ।
थ्व इलय् जमीन जोत्नेको नारा सार्थक जूगु इल्य् ला बाली पुले माःगु मपूसां जिल, नेमकिपां धाःथें जमीन जोत्नेको वा बाली पुले म्वायेक नं गुथिया जग्गा थःगु नामय् तःसां जिल वा मिया छ्वसां जिल । तर उगु हे जग्गाया भरय् जात्रा चले यायेमाःगु गुथि, संघ संस्था वा धल्चा भजनया लागिं धाःसा बाली मवयेवं जात्रा पर्व चले यायेत बाध्य धाःसा मजुल । उकिं थ्व इलय् नेमकिपां थ्वयेका च्वंगु जमीन जोत्नेको नाराय् हिउपाः वयेमाः ।
LEAVE YOUR COMMENTS