बलात्कारय् जनजाति मिस्त अप्वः शिकार

येँ – नेपालय् थौंकन्हय् देय्न्यंकं हे मिसा व मिसामस्त बलात्कारया शिकार जुयाच्वंगु समाचार न्यने दयाच्वंगु दु । थ्व बलात्कारया शिकार जुयाच्वंपिं मध्ये नं दकलय् अप्वः जनजाति मिस्त हे लानाच्वंगु खँ छगू तथ्यांकपाखें सीदुगु दु ।
जागरण मिडिया सेन्टरं म्हिगः छगू पत्रकार सम्मेलन यासें जारी याःगु प्रतिवेदन कथं वंगु स्वदँया दुने बलात्कार जूपिं मिसा मस्तय् जातिगत विश्लेषण यायेबलय् ३४ प्रतिशत आदिवासी जनजाति समुदायया मिस्त बलात्कारया शिकार जूगु दु ।

अथे हे बलात्कारया शिकार जूपनि निगूगु स्थानय् दलित समुदायया मिस्त लानाच्वंगु दु । थ्व समुदायया १९ प्रतिशत मिस्त बलात्कारया शिकार जूगु खनेदु । तथ्यांक कथं क्षेत्री जातिया १८ प्रतिशत व ब्रम्हू जातिया ९ प्रतिशत मिस्त बलात्कारया शिकार जूगु दु । ब्रम्हू व क्षेत्री निगुलिं जातियात छथासं तयेबलय् धाःसा थ्व समुदायया २७ प्रतिशत मिस्त बलात्कारया शिकार जूगु खनेदु ।

उकथं हे मधेसी ६ प्रतिशत व मुस्मां समुदायया ४ प्रतिशत मिस्त बलात्कारया शिकार जूगु दु । उगु प्रतिवेदनय् धयातः कथं दलित समुदायया मिसा व मिसामस्त बलात्कारया शिकार जुइगु घटना अप्वयाच्वंगु दु । नेपालय् चालु आर्थिक दँया वंगु गुलाया दुने जक ११३० गू बलात्कारया घटना प्रहरीइ दर्ता जूगु दु ।