ने. सं. ११४६ बछलागा चौथी -

स्वनिगः मेयर फोरमय् चिरिबाबु महर्जन

येँ (नेपालभाषा टाइम्स)- स्वनिगः मेयर फोरमया अध्यक्षय् यल महानगरपालिकाया मेयर चिरिबाबु महर्जनयात ल्यःगु दु । स्वनिगःया महानगरपालिका, उपमहानगरपालिका व नगरपालिकाया प्रमुखपिं दइगु उगु फोरमया उपाध्यक्षय् वासुदेव थापा सूर्य विनायक, महासचिव घनश्याम गिरी चन्द्रागिरी, सचिवय् प्रकाश अधिकारी तोखा, कोषाध्यक्षय् कृष्णहरि महर्जन तारकेश्वर व सहसचिवय् सुरेन्द्र श्रेष्ठ थिमि च्वनादीगु दु ।

वंगु बिहीवाः क्वचाःगु फोरमया बैठकं न्हूगु कार्यसमिति ल्ययेगुया लिसें स्वनिगलय् दुहां वइगु प्रमुख नाका नागढुंगाय् ‘अटोमेटिक भेहिकल डिटेक्सन एन्ड मनिटरिङ सिस्टम’ जडान यायेगु प्रक्रिया न्ह्याकेगु निर्णय नं याःगु दु । उकिया नितिं निगू करोड तका तुइगु खँ धाःगु दु ।