हानं टिप्पर च्याका बिल

येँ – बनेपाय् टिप्परं ठक्कर नकाः छम्ह मनू सीवं तम्वःपिं स्थानीय जनतां टिप्पर च्याका बिउगु दुसा लिकसं च्वंगु छगू प्रहरी बिट नं तछ्याना बिउगु दु । म्हिगः न्हिनय् बनेपां धुलिखेलपाखे वनाच्वंगु टिप्परं बनेपाया दुवातय् मोटरसाइकलयात ठक्कर नकेवं मोटरसाइकल गयावःम्ह सीगु खः । टिप्परं ठक्कर नकाः नमूरा खनालथोकया जीतबहादुर तामाङ सीगु खः ।

स्थानीय जनतां च्याका बिउगु बा. २ क ३९३४ नम्बर टिप्पर धाःसा पूवंक क्षति जूगु खँ धाःगु दु । टिप्परं च्याका बीवं बनेपा नगरपालिकाया ट्यांकर हयाः मि स्यायेत स्वःगु खःसां टिप्पर बांमलाक च्यायेधुंकूगुलिं पूवंक क्षति जूगु खँ धाःगु दु । प्रहरी टिप्पर चले यानावःम्ह नुवाकोटया २९ दँ दुम्ह सुधन श्रेष्ठयात ज्वनेधुंकूगु दु ।