ससफोया नीति व कार्यक्रमयात कयाः कार्यशाला गोष्ठि

ख्वप – संघीय समाजवादी फोरम नेपालया नीति तथा कार्यक्रम मस्यौदा समितिया ग्वसालय् कार्यशाला गोष्ठि जुल । थनया सूर्यविनायकय् जूगु गोष्ठि समापन ज्याझ्वलय् नवासें पार्टीया सहअध्यक्षनापं नीति तथा कार्यक्रम मस्यौदा समितिया संयोजक राजेन्द्रप्रसाद श्रेष्ठं थौं देय्या राजनीति संघवादी व गैरसंघवादी दथुइ ध्रुवीकृत जुया वनाच्वंगु दु धयादिल ।

संयोजक श्रेष्ठं संघीय समाजवाद प्राप्तिया निंतिं नेपाःया लँपु छु गज्याःगु जुइमाः धइगु सन्दर्भय् पार्टीया न्हापांगु राष्ट्रिय महाधिवेशनया दस्तावेज मस्यौदाया निंतिं पार्टी नीति निर्माणय् पार्टीया जिम्मेवार केन्द्रीय विभाग व संयन्त्रया प्रतिनिधितय् दथुइ संक्षिप्त अवधारणासहितया ज्यापौ न्ह्यब्वयादीगु खः ।

वय्कलं दस्तावेजया मस्यौदापूर्व कार्यशालां दस्तावेजप्रति कार्यकतातय्गु अपनत्व जुइगु नं धयादिल । सत्तारुढ व प्रमुख प्रतिपक्षी दलं नं समाजवादया हे खँ ल्हानाच्वंगु सन्दर्भय् संघीय समाजवाद इमिगु स्वयां छु छुं खँइ् फरक दु धइगु स्पष्ट रुपं खँ पिहां वयेमाःगु व उगु पार्टीया विचाः समायोजन थें जुइ मजिउगु सहभागितातय् सुझावयात दस्तावेज मस्यौदा यायेबलय् ध्यानय् तयाः वनेगु जुइधयादिल ।

थःपिंत समाजवादी धकाः धाइपिं नेपाःया पुलांगु छुं नं पार्टीं नेपाःया बहुराष्ट्रियतायात संबोधन यायेत अन्तर्राष्ट्रिय मान्यता अनुरुप संघवादयात राज्यशक्तिया बाँडफाँड यानाः शासन संचालन यायेगु शासन प्रणालीया सिद्धान्तया रुपय् स्वीकार याये मफुगु द्वपं वय्कलं बियादिल ।

दस्तावेज मस्यौदा समितिया दुजःपिं नापं केन्द्रीय विभाग व संयन्त्रया प्रतिनिधि यानाः न्यय्म्हं मल्याक सहभागि जूगु कार्यशालाय् राजनीतिक, आर्थिक, सामाजिक व सांस्कृतिक व परराष्ट्र यानाः प्यंगू विधाय् प्यंगू हे पुचःया दथुइ व्यापाक सहलह याःगु खः । सहलह लिपा थःथःगु समूहया प्रतिनिधित्व यासें पदम अधिकारी, डा. उमाशंकर प्रसाद व छायाँ शर्मा, प्रेम थापा व आङकाजी शेर्पां सुझावत न्ह्यब्वयादीगु खः ।