मध्यपुर थिमिइ स्थानीय पाठ्यक्रम निर्माण

थिमि – मध्यपुर थिमि नगरपालिकां स्थानीय पाठ्यक्रम निर्माण याःगु दु । नगरपालिकां थःगु कार्य क्षेत्र दुने संचालन जुयाच्वंगु विद्यालयया निंतिं आधारभूत तहया पाठ्यक्रम निर्माण याःगु खः ।मध्यपुर थिमि नगर पालिकाया स्थानीय पाठ्यक्रम निर्माण समितिं ग्वसाः ग्वःगु स्थानीय पाठ्यक्रम निर्माण सम्बन्धी कार्यशाला गोष्ठिइ पाठ्यक्रमयात अन्तिम रुपं बिउगु खः ।

स्थानीय तहयात थःगु हे स्थानीय पाठ्यक्रम लागू यायेगु संवैधानिक व्यवस्थाकथं थःगु हे पाठ्यक्रम लागू याःगु मध्यपुर थिमि नगरपालिका देय्या निगूगु नगरपालिका जुइत ताःलाःगु दु । नगरपालिका प्रमुख मदनसुन्दर श्रेष्ठं नगरपालिकाया दुनेया ब्वनेकुथिइ १ गूनिसें ८ गू तगिंतक आधारभूत तहय् अध्ययन याइपिं विद्यार्थीया निंतिं स्थानीय विषयवस्तु दुथ्याकाः पाठ्यक्रम तयार यानागु जाकारी बियादिल ।

नगरप्रमख श्रेष्ठं धयादिल, ‘नगरया विद्यार्थीतय् निंतिं स्थानीय विषयवस्तु दुथ्याकाः ‘मध्यपुर थिमिया म्हसीका’ नांया पाठ्यक्रम तयार यानागु दु ।’‘मध्यपुर थिमिया भौगोलिक अवस्थिति, इतिहास, पर्यावरण, कला, संस्कृति, सम्पदा, स्थानीय प्रचलित संस्कार, स्थानीय बोलीचाली, नेपाल लिपि, रञ्जना लिपि, नगरया परम्परागत पेशा, व्यवसाय, स्थानीय सीप, प्रविधि व स्थानीय उपचार विधियात दुथ्याकाः पाठ्यक्रम निर्माण यानागु दु’ नगर प्रमुख श्रेष्ठं धयादिल ।

वइगु जेठ १ गतेनिसें छगूनिसें खुगू तगिंतक मध्यपुर क्षेत्र दुनेच्वंगु झिंच्यागू सार्वजनिक व ५२ गू सामुदायिक यानाः ७० गू विद्यालयय् लागू यायेगु जुइ धासें नेपाःया स्थानीय तहमध्ये थःगु हे पाठ्यक्रम लागू याइगु मध्यपुर थिमि नगरपालिका निगूगु जूगु नं धयादिल ।लिपा बुलुहुं मेमेगु तगिमय् नं स्थानीय पाठ्यक्रम लागू याना यंकेगु योजना दुगु धासें स्थानीय पाठ्यक्रमयात प्रयोगात्मक शैलीइ अध्यापन याका यंकेगु वय्कलं धयादिल ।

नगरपालिकां स्थानीय पाठ्यक्रम निर्माणया निंतिं छगू समिति नं गठन याःगु खः । शिक्षाविद्लिसें प्राध्यापक रामकृष्ण दुवालया संयोजकत्वय् प्रधानाध्यापक चरणकेशरी श्रेष्ठ, प्रिन्सिपल सूर्यबहादुर भण्डारी दुजलय् च्वनादीगु स्थानीय पाठ्यक्रम निर्माण समिति गठन याःगु खः ।

समितिं स्थानीय पाठ्यक्रम निर्माणया निंतिं शिक्षा ख्यःया विज्ञतलिसें व्यापक सहलह याःगु खः । सहलह लिपा पाठ्यक्रमयात अन्तिम रुप बीधुंकाः कार्यशालाया ग्वसाः ग्वःगु खः । गोष्ठिइ प्रा. डा. प्रकाशमान नानी श्रेष्ठ, धर्मसुन्दर वज्राचार्य, इञ्जिनीयर राजेन्द्र श्रेष्ठ, बुद्धिकुमार द्यो लगायतं सुझावसहितया टिप्पणी यानादीगु खः ।