ने. सं. ११४३ चौलाथ्व पारू -

सम्झौता भंग याःगुलिं विश्वन्यंकं ट्रम्पया आलोचना

बेलायत, फ्रान्स व जर्मनीं अमेरिकी राष्ट्रपति डोनाल्ड ट्रम्पं इरानलिसेया पारमाणिक सम्झौता त्वाःथलेत याःगु निर्णय दुःखद जूगु खँ धाःगु दु । उमिसं थःपिनिगु सुरक्षाया निंतिं नं थ्व सम्झौता महत्वपूर्ण दुगु खँ धाःगु दु । अथेहे उमिसं मेमेगु देशं थ्व सम्झौता कार्यान्वयनयात निरन्तरता बीबलय् वाशिंगटनं थुकी पंगः थनेगु ज्या यायेमजिउगु खँ नं धाःगु दु ।

ट्रम्पं सम्झौता त्वाःथलेगु खँ धाःसां युरोपेली संघ व रुसं धाःसा सम्झौतायात निरन्तरता बीगु प्रतिबद्धता प्वंकूगु दु ।
तर मध्यपूर्वय् वाशिंगटनया मू साझेदार जुयाच्वंगु इजरायल व साउदी अरेबियां धाःसा अमेरिकी निर्णययात लसकुस याःगु दु ।इजरायली प्रधानमन्त्री बेन्जामिन नेतान्याहुं ट्रम्पया साहसिक निर्णय धासें प्रशंसा याःगु दु ।

वय्कलं इरानलिसे न्हापा जुयाच्वंगु सम्झौता विपद् हइगु कथंया जूगु खँ धाःगु दु । अथेहे साउदी अरेबियां इरानलिसे जुयाच्वंगु सम्झौता मध्यपूर्वय् अस्थिरता हयेगु तेहरानया कुतःयात ग्वाहालि याइगु कथंया दुगु खँ धया वयाच्वंगु खः ।ट्रम्पया निर्णयय् प्रतिक्रिया बिसें इरानी राष्ट्रपति हसन रुहानीं अमेरिका बाहेक थ्व पारमाणविक सम्झौता कायम याना तयेफइ कि फइमखु धकाः स्वयेत थः विदेशमन्त्रीयात आदेश बिउगु दु ।

थुकिया निंतिं रुहानीं वइगु वाःनिसें युरोपेली देय्त, चीन व रुसलिसे वार्ता यायेत विदेश मन्त्रालययात आदेश बीधुंकूगु दु । वय्कलं धयादीगु दु, ‘यदि चिधंगु इलय् जक नं थ्व सम्झौतां लबः दइगु जुल धाःसा सम्झौता कायम हे यानातयेगु जुइ ।’
अथेहे वय्कलं कुटनीतिक वार्ताया लिच्वः स्वयां थःपिंसं औद्योगिकस्तरय् युरेनियम प्रवद्र्धनया निंतिं तयार जुइत अधिकारीतय्त आदेश बीफुगु खँ नं धयादीगु दु ।

वय्कलं अमेरिकी राष्ट्रपति ट्रम्प मनोवैज्ञानिक युद्ध पाखे न्ह्याःवनाच्वंगु द्वपं नं बियादीगु दु ।अमेरिकी राष्ट्रपति ट्रम्पं स्थानीय ई कथं मंगलवाः न्हिनय् इरानलिसेया पारमाणविक सम्झौता ग्यानापुगु व एकपक्षीय धासें थुगु सम्झौतां अलग च्वनेगु घोषणा याःगु खः ।

वय्कलं आतंकवाद प्रायोजन याइगु विश्वया अग्रणी देय्तय्त थ्व सम्झौतां पारमाणविक बम हासिल यायेत पनेमफइगु खँ धया वयाच्वंगु खः । वय्कलं इरान विरुद्ध अमेरिकां न्हापा तयातयागु उच्च प्रतिबन्ध हाकनं सुरु यायेगु खँ नं धयादीगु खः । मेखे थ्व सम्झौता याकूम्ह तत्कालीन अमेरिकी राष्ट्रपति बराक ओमाबां ट्रम्पया निर्णयया निन्दा यानादीगु दु ।