‘व्यापार युद्ध वास्तविक जुइधुंकल’

एजेन्सी-जी ट्वान्टीइ धाइगु तःधंगु अर्थतन्त्र दुगु विश्वया नीगू देय्या मन्त्रीतय् शिखर बैठकया निंतिं अर्जेन्टिनाय् मुनेगु झ्वलय् फ्रान्सया अर्थमन्त्री बु्रनो ल मेयरं व्यापार युद्ध आःया छगू वास्तविकता जुइधुंकूगु खँ धयादीगु दु ।

एकतर्फी रुपं कर लगे यायेगु अमेरिकी व्यापार नीति जंगली कानुनय् आधारित जूगु वय्कलं द्वपं बियादीगु दु । तर अमेरिकी अर्थमन्त्री स्टिभन मनुसिनं अमेरिकी करया बचाउ यासें युरोपेली संघ व चीनयात स्वतन्त्र प्रतिस्पर्धाया निंतिं थःथःगु बजाः खुल्ला यायेत इनाप यानादिल ।

अर्जेन्टिनाया ब्युनर्स आयर्सय् निन्हुयंकं जुइगु वार्ताय् तःधंगु अर्थतन्त्र दुगु नीगू देय्या अर्थमन्त्री व बैंकरत मुनाच्वंगु दु ।
फ्रान्सया अर्थमन्त्री ल मेयरं समाचार संस्था एएफपीलिसे खँ ल्हासें विश्व बजाः जंगली कानुनय् आधारित जुइमजिउ धासें एकतर्फी रुपं कर अप्वयेकेगु जंगली कानुन खः धयादीगु खः ।

‘जंगली कानुन, फुपिनि निंतिं कानुन, विश्वा व्यापार सम्बन्धया भविष्यय् थ्व जुइफइमखु’ धासें वय्कलं धयादीगु दु,‘जंगली कानुनं वृद्धियात कमजोर याइ, कमजोर देय्तय् निंतिं तसकं थाकुइ, अले थुकिं भयावह राजनीतिक लिच्वः हइ ।’

फ्रान्सया अर्थमन्त्री मेयरं व्यापार युद्ध आःया वास्तविकता जुइधुंकूगु धासें अमेरिकां स्टिल व आल्मुनियमय् काःगु कर लित मकाल धाःसा युरापेली संघलिसे स्वतन्त्र व्यापार बारे वार्ता यायेमफइगु खँ वय्कलं धयादीगु दु ।

अमेरिकी अर्थमन्त्री मनुसिनं धाःसा संघ व चीनलिसेया व्यापार बारे ट्रम्पया अडानयात समर्थन यासें संघ व चीनं थःथःपिनि बजाः खुल्ला यायेमाः धयादीगु खः ।

वंगु वालय् जक अमेरिकी राष्ट्रपति डोनाल्ड ट्रम्पं व्यापारया निंतिं युरोपेली संघ सत्रु खः धयादीगु खः । थ्व धुंकाः ट्रम्पं हाकनं अमेरिकाय् दुहां वइगु ५०० अर्ब डलर बराबरया फुक्क चिनिया सामानय् कर कायेगु धम्की बिउगु खः ।

अमेरिकां नीच्यागू दुजः देय् दुगु युरोपेली संघ व चीन निगुलिसें तःधंगु व्यापार घाटा फया वयाच्वंगु दु ।