ने. सं. ११४३ तछलागा चौथी -

चीनया मेगु चमत्कार

विश्व अर्थतन्त्रय् द्रुत गतिं न्ह्याः वनाच्वंगु चीनं अनेकौं आपालं थीथीकथंया योजनात हयाः विश्वयात अजू चायेका वयाच्वंगु दु । खतुं चीनं अर्थतन्त्रय् जक थुकथं द्रुत गतिं न्ह्याः वनाच्वंगु मखसे विज्ञान, प्रविधिलिसें भौतिक पूर्वाधारया ख्यलय् नं उकथं हे विश्व हे अजू चाइकथं चमत्कारिक ज्या याना वयाच्वंगु दु ।

थ्व हे झ्वलय् चीनं हाकनं मेगु छगू चमात्कारिक ज्या याःगु दु । चीनं लिपांगु इलय याःगु चमत्कारिक ज्या इन्जिनियरिंग ख्यलय् खः । चीनया थ्व चमत्कार स्वयाः सुं नं दंग जुया मच्वने फइमखु, अले सकसिनं ‘वाह ! गजब ।’ धायेमाःगु स्थिति तकं वइ ।चीनं इन्जिनियरिंग क्षेत्रय् न्हूकथंया छगू भवन दयेकूगु दु, वनं विशाल भवन ।

झीसं आतक गुलि नं भवन खना च्वना, स्वया वयाच्वना व दक्वं भवन धंका तःगु हे जक खनाच्वना, स्वयाच्वना । अर्थात धस्वानाच्वंगु भवन जक स्वयाच्वनागु खः । अले भवन धइगु नं धस्वाकेगु हे खत ।तर चीनं धस्वानाच्वंगु भवन मखु ग्वतुलाच्वंगु अर्थात द्यनाच्वंगु भवन दयेकाः इन्जिनियरिंग क्षेत्रय् छगू न्हूगु आयाम तना बिउगु दु ।

चीनं दयेकूगु थ्व ग्वतुलाच्वंगु भवन जमीनय् मखु, थामय् खः । व विशाल महलय् । चीनं थःगु थ्व परियोजनायात ‘¥याफल सिटी चोङकिङ’ नां बिउगु दु । चोङकिङ सहरया योङझोउ जिल्लाय् दयेकूगु थ्व विशाल महल विश्वया हे दकलय् ताःहाकःगु स्वंगूगु महल नं खः । छेँ, भवन, ज्याकू, टावर अले देगः आदि न्ह्यागु हे जुइमा झीसं धस्वानाच्वंगु हे जक खना वयाच्वनागु खः ।

उकिं थ्व ग्वतुलाच्वंगु भवन स्वयम थः हे अजू चायापु । थ्व द्यनाच्वंगु भवनया हाकः २५० मिटर दु । अले थ्व भवनय् १४०० स्वयां अप्वः सुविधा सम्पन्न अपार्टमेन्ट दु । पूर्णरुपं तयार जुइत अन्तिम चरणय् थ्यनाच्वंगु थ्व भवनय् छगू लक्जरी होटल, छगूत्या लाख स्वयां अप्वः वर्गमिटरया ततःधंगु ज्याकू अले सपिङ सेन्टर नं दु ।

झ्वाट्ट स्वयेबलय् गुगुं छगः डुंगा थेंच्वंगु थ्व भवनया च्वय्या तँय् चीनया याङ्जे व जियालिङ खुसिया दोभान थें खने दुगु संरचनाकथं दयेकातःगु दु । प्यंगू खर्ब ३२ गू अर्ब लागतय् दयेकाच्वंगु थ्व भवन दयेकेत हे जक खुदँया ई काये धुंकूगु दुसा थ्व भवनया डिजाइन इजरायली आर्किटेक्ट मोशे स्याफेदीं याःगु खः ।