प्रधानमन्त्रीयात अविश्वास – सुनां छु धाल
कोरोना पनेगु त्वःताः धरहरा उलेज्या ः देउवा
येँ – प्रमुख प्रतिपक्षी दल नेपाली कांग्रेसया सभापति शेरबहादुर देउवां देशय् कोरोना संक्रमणया भयावह अवस्था हयेगुली सरकार जिम्मेवार जूगु द्वपं बियादीगु दु । म्हिगः प्रतिनिधिसभाय् प्रधानमन्त्रीं फ्वंगु विश्वासया मत बारे थःगु बिचाः प्वंकुसें वय्कलं उगु द्वपं बियादीगु खः ।
वय्कलं धयादिल, ‘निवाः न्ह्यः हे संक्रमणया अवस्था तच्वया वनाच्वंगु खः, तर प्रधानमन्त्री संक्रमण पनेगु स्वयां नं तामझामपूर्वक तयार मजूगु धराहरा उलेज्या यायेत न्ह्यचिलादिल, थ्व गैरजिम्मेवारीया नमूना खः ।’
प्रधानमन्त्री थम्हं हे वासः मदयाः सुं नं नेपाःमिं जनतां ज्यान गुमे याये माली मखु धाःगु खँयात लुमंकुसें सभापति देउवां प्रमयात न्ह्यसः तयादिल, ‘थौं सिनाच्वंपिं चाहिँ नेपाःमि मखु ला ? गन वन छिगु प्रतिवद्धता ?’
सभापति देउवां संसदय् न्ववासें प्रधानमन्त्री केपी ओलीया सरकार क्वःदल धाःसा वयां लिपा गठन जुइगु सरकारया विकल्प नं न्ह्यब्वयादिल । वय्कलं ओलीया सरकार क्वःदलेधुंकाः संविधानया धारा ७६ (२) कथं मिलिजुली सरकार गठन यायेगु प्रस्ताव तयादिल ।
छि संघीयता खत्तम यायेत्यंम्ह खः – दाहाल
येँ – माओवादी केन्द्रया अध्यक्ष पुष्पकमल दाहालं प्रधानमन्त्री केपी ओलीयात संघीय व्यवस्था व समानुपातिक समावेशी धइगु सिद्धान्त हे सिधयेका छ्वयेत्यंगु द्वपं बियादीगु दु । म्हिगः संसदय् न्ववासें वय्कलं धयादिल, ‘समानुपातिक समावेशी धइगु ला खँ हे छि न्यने मयः । संघीयता नं छितः यःगु ला मखु । वहे वाफय् वःगुलिं माने याना बियागु जक खः धइगु छिगु धापू खः । उकिं गनं थःगु ल्हातय् शक्ति वयेसातकिं थ्व संघीयता व समावेशिता धइगु हे सिधयेकेगु कुतः जकं छिं यानादीत्यनागु मखु ला ?’
वय्कलं आः अप्वः राजनीतिक जालझेल यायेगु त्वःताः सहज ढंगं निकास बीत इनाप यासें उकिया लागिं प्रधानमन्त्री छम्ह बाहेक मेपिं फुक्कस्यां हे विश्वासया प्रस्ताव विरुद्ध मत बियाः न्हूगु अभियान शुरु याये नु धकाः नं आह्वान यानादिल । लिसें वय्कलं नेकां सभापति शेरबहादुर देउवां तयादीगु संविधानया धारा ७६ (२) कथं मेगु सरकार दयेकेगु प्रस्तावयात समर्थन नं यानादिल ।
लोकतन्त्र वयेधुंकाः नं जिपिं पीडित – ठाकुर
येँ – जनता समाजवादी पार्टीया अध्यक्ष महन्थ ठाकुरं देशय् लोकतन्त्र वयेधुंकाः नं थःपिं अझ नं विभेदया शिकार जुयाच्वनागु खँ कनादीगु दु । देशय् लोकतन्त्र हयेगु लागिं न्हापा नापं हे संघर्ष यानागु खःसां थौं लोकतन्त्र वयेधुंकाः नं जातीय आधारय्, क्षेत्रीय आधारय् विभेद कायम हे जुयाच्वंगु खँ वय्कलं कनादीगु खः । नेता ठाकुरं धयादिल, ‘लोकतन्त्र वयेधुंकाः नं जिपिं पीडित अवस्थाय् दु, पासापिं जेलय् लानाच्वंगु दनि ।’
धायेबलय् झीगु समाज विविधतां जाः धायेगु याःसां थौं न्ह्याथासं नं छगू हे ख्वाःयापिं जक मनूत खने दयाच्वंगु खँ नं वय्कलं न्ह्यथनादिल । संविधानय् प्रधानमन्त्रीयात निदँ तक अविश्वासया प्रस्ताव तये दइ मखु धकाः च्वयातल, तर निदँ मदुनिबलय् हे प्रधानमन्त्री अल्पमतय् लात धाःसा छु यायेगु धासें वय्कलं संविधानया थज्याःगु त्रुटियात चीकेमाःगु माग नं यानादिल ।
लोकतन्त्र वयेधुंकाः नं थःपिनि माग यथावत दनि धासें वय्कलं थ्व प्रस्तावया पक्षय् वा विपक्षय् मत मबिसे तटस्थ च्वनेगु खँ धयादिल ।
समावेशिताया अःखः ज्या जूगु दु ः यादव
येँ – जनता समाजवादी पार्टीया नेता उपेन्द्र यादवं देशय् संघीयता व समावेशिताया मर्म विपरित दकलय् अप्वः ज्या प्रधानमन्त्री केपी ओलीया हे सरकारया पालय् जूगु द्वपं बियादीगु दु । म्हिगः संसदय् न्ववासें वय्कलं धयादिल, ‘प्रधानमन्त्रीं थ्व अवधि दुने याःगु नियुक्तित जक स्वयादीसां गाः, वय्कलं समावेशितायात गुलि ध्यान बियादीगु दु सी दइ ।’
प्रधानमन्त्री ओलीं थीथी कानून दयेकाः प्रदेशतय्गु अधिकार लित कयाच्वंगु द्वपं बिसें न्ह्यसः तयादिल, ‘आः छु छितः संघीयता ध्वस्त यायेगु लागिं विश्वासया मत बीगु ला ?’
प्रधानमन्त्री ओलीं संसद प्रति विश्वास मदयाः हे संसद भंग याःगु खः धासें आः वहे संसदं वय्कःयात गय् यानाः विश्वासया मत बीगु धकाः नं न्ह्यसः तयादिल ।
प्रम ओलीं योजना मदुगु परियोजनाया शिलान्यास व सिमधःनिगु योजनाया उलेज्या यानाच्वंगु द्वपं बिसें ओलीया पालय् ‘दरिद्र नेपाल, दुःखी नेपाली’ जूगु द्वपं वय्कलं नं बियादिल । यादवं विश्वासया मतया विपक्षय् भोट बीगु खँ नं कनादीगु खः ।
LEAVE YOUR COMMENTS