गणेशमानया त्याग, समर्पणयात कयाः अन्तरक्रिया
येँ (नेपालभाषा टाइम्स) – गणेशमान सिंह अध्ययन प्रतिष्ठानया ग्वसालय् नेपाः राजनीतिइ गणेशमानया त्याग, समर्पण, संघर्षशीलता व थौंया ल्याय्म्ह विषयय् छगू मुँज्या जुल ।
जूम अनलाइनपाखें जूगु भर्चुअल मुँज्याय् नेपाली कांग्रेसया केन्द्रीय दुजः नापं प्रतिष्ठानया नायः नवीन्द्रराज जोशीं जनताया निंतिं ज्या याये व जनता नापनापं हे न्ह्यःने न्ह्याः वने धइगु सोच तयाः न्ह्याः वनेमाःगु आवश्यक जूगु खँ धयादिल । वय्कलं देशय् हिउपाः हयेगु निंतिं थौं नं ल्याय्म्ह पुस्तात सक्रिय रुपं न्ह्यज्यानाच्वंगु दु धयादिसें जनआन्दोलनया नेतृत्व याःगु दल नेपाली कांग्रेस थौं प्रमुख प्रतिपक्षया हैसियतय् च्वनाच्वंगु दुःखद खँ जूगु धयादिल ।
पुलांम्ह मन्त्रीतकं जुयादीम्ह वय्कलं राजनीतिइ नैतिकता व इमान्दारितायात त्वःताः न्ह्याः वनेगु मखसे थ्व निगुलिंयात नापं न्ह्यःने तयाः न्ह्या वनेमाःगु आवश्यक जू धयादिल । नैतिकता व इमान्दारिता त्वःतल धाःसा ताःहाकःगु संघर्षपाखें प्राप्त जूगु उपलब्धि तकं छखे लाइगु खतरा दुगु वय्कलं धयादिल ।
राजनीति धइगु हे सत्ता प्राप्तिया निंतिं यायेगु खःसां नं राजनीति धइगु सत्ता प्राप्ति जक मखु धयादिल । लोकतान्त्रिक मूल्य, मान्यता व आदर्शयात कःघानाः न्ह्याः वनेमाःगु खँय् बः बियादिसें वय्कलं न्हापांगु जनआन्दोलनया सर्वोच्च कमान्डरलिसें लौहपुरुषया रुपय् तकं स्थापित जुयादीम्ह गणेशमानयात लुमंकाः वय्कलं यनादीगु संघर्षया लँपुइ झी नं न्ह्याः वनेगमाः धयादिल ।
प्रदेशसभा सदस्य जीवन डंगोलं गणेशमान सिंह राणा विरोधी आन्दोलन यानाः जनताया अधिकार प्राप्तिया निंतिं सघर्षशील व्यक्तित्व जूगु चर्चा यानादिल । ज्याझ्वलय् थीथी वक्तातय्सं नं जनताया हक व अधिकारया निंतिं इमान्दारीपूर्वक संघर्ष याःम्ह नेता गणेशमान जूगु विचाः तयादीगु खः ।
LEAVE YOUR COMMENTS