राष्ट्रपति चुनाव हे अन्यौलय्

येँ (नेपालभाषा टाइम्स)÷राष्ट्रपति पदय् ‘राष्ट्रिय सहमति’ कायम यायेगु धकाः प्रधानमन्त्री पुष्पकमल दाहालं यानाच्वंगु अलमलं यानाः राष्ट्रपतिया चुनाव गबले जुइ धकाः हे धाये मफइगु अवस्थाय् लाःवंगु दु ।

वर्तमान राष्ट्रपति विद्यादेवी भण्डारीया कार्यकाल फागुन २९ गते क्वचाइगु जुयाच्वंगु दुसा व स्वयां न्ह्यः हे राष्ट्रपतिया चुनाव जुइमाःगु खः । उकिया लागिं आः चुनावया मिति क्वःछीगु ई त्ययेधुंकूसां नं सरकारं मिति हे क्वःछी फयाच्वंगु मदुनि । निर्वाचन आयोगं फागुन २५ गते राष्ट्रपतिया चुनाव यायेगु धकाः मिति प्रस्तावित यानातःगु दुसां सरकारं धाःसा उकियात स्वीकार याःगु मदुनि ।

थ्वहे झ्वलय् म्हिगः च्वंगु नेपाली कांग्रेसया पदाधिकारीतय्गु बैठकं निर्धारित इलय् हे राष्ट्रपतिया चुनाव यायेमाः धकाः सरकारयात इनाप याःगु दु । नापं निर्वाचन आयोगयात नं निर्धारित इलय् हे चुनाव यायेमाः धकाः आग्रह याःगु दु । सरकारं ताः ई तक आलटाल यानाः राष्ट्रपतिया चुनाव इलय् मयाइगु सम्भावना खंकाः कांग्रेसं थ्व माग याःगु खँ धाःगु दु ।

लिसें कांग्रेसया बैठकं आः जुइगु राष्ट्रपति निर्वाचनय् कांग्रेसं नं उम्मेदवार थनाः दावी यायेगु निर्णय याःगु दु । राष्ट्रपति निर्वाचनय् थः उम्मेदवार त्याकेगु लागिं संसदय् दुथ्याःगु मेमेगु दलतलिसे खँल्हाबल्हा न्ह्याकेगु निर्णय नं बैठकं याःगु दु । कांग्रेसं राष्ट्रपति पदय् उम्मेदवार थनेगु धाःसां उम्मेदवार थ्वहे जुइ धकाः धाःसा आः तक धाःगु मदुनि ।

अथे हे एमालें नं राष्ट्रपति पदय् दावी यानाच्वंगु दनि । एमालें सरकारयात समर्थन यायेत हे राष्ट्रपति पद थःत माः धकाः शर्त तःगु खः । एमालें नं दावी याःसां उम्मेदवार धाःसा क्वःछिउगु मदुनि । तर विश्वस्त सूत्रतय्सं धाःसा राष्ट्रपति पदय् प्रधानमन्त्री दाहालं थःगु पाखें मेम्ह हे मनूया नां प्रस्तावित याइगु सम्भावना दुगु खँ धाःगु दु ।

सम्बन्धित बुखँ

LEAVE YOUR COMMENTS