ज्वर जक वःसां डेंगु आतंक

येँ – डेंगुया कारणं सरकारी लिसें निजी अस्पतालत अथें नं कायल जुयाच्वंगु दु । उकिसनं थ्वहे इलय् डेंगु थें हे ज्वर वइगु मेगु ल्वय् नं छम्हं मेम्हेसित सरे जुयाः भाइरल जुया बीवं अस्पतालय् विरामी तयां तयेथाय् मदयेक भीड जूगु दु । थौंकन्हय् स्वनिगःया थाय्थासय् टाइफाइड, सेखं चाइगु, मुसु वइगु थेंज्याःगु ल्वय् व्यापक रुपं न्यना वनाच्वंगु दु ।

लिसें थ्वहे इलय् डेंगु नं न्यना वंगु जुयाः मनूत भचा जक ज्वर वःसां डेंगु खः ला धकाः परीक्षण याकेत अस्पताल ब्वाँय् वनीगु जुयाच्वंगु दु ।
न्हापा न्हापा नं सेखं ज्वर वयेवं मनूत अस्पताल क्यनेत ब्वाँय् वनीगु खःसां थुगुसी डेंगुया ग्याःचिकुं यानाः सामान्य अवस्थाय् नं मनूत अस्पताल ब्वाँय् वंगु कारणं थज्याःगु साधारण विरामीतय् ल्याः न्हापां स्वयां अप्वः खने दुगु खँ धाःगु दु ।

तर सरकारी लगायत मेमेगु अस्पतालया डाक्टरत धाःसा थौंकन्हय् डेंगु ल्वगितय्त स्वयेगुपाखे हे अप्वः केन्द्रित जुइमाःगुलिं डेंगु बाहेकया ल्वय् स्वयेगु फुर्सद उमिके मदयाच्वंगु दु । डेंगुया कारणं ज्वर जक वयेवं हे ग्यानाः अस्पताल ब्वाँय् वइपिं विरामीतय्सं यानाः डंगुया उपचारतय् समेत लिच्वः लानाच्वंगु खँ धाःगु दु ।

थौंकन्हय् डेंगुपाखें अप्वः यानाः ल्याय्म्हल्यासेत प्रभावित जुयाच्वंगु दुसा सेखं ज्वरपाखें धाःसा मस्त व बुराबुरीत प्रभावित जुयाच्वंगु दु ।
मौसमया प्रभावं यानाः वइगु थ्व ल्वय्यात डाक्टरतय्सं स्क्रबटाइफस ल्वय् धाःगु दु । थुकी तसकं हे मुसु वइगु, ज्वर वइगु जुल धाःसा तुरुन्त अस्पताल यंकेमाः धाःगु दु । थुगु दँय् थ्व ल्वचं कयाः सीपिं मनूतय् ल्याः १२ म्ह निसें १५ म्ह तक थ्यंगु दयेमाः धइगु अनुमान दु ।