थौं ४ बजे शितल निवासय् न्हूम्ह प्रधानमन्त्रीया शपथ ग्रहण

येँ (नेपालभाषा टाइम्स)÷कांगे्रस नेतृत्वया गठबन्धन त्वःताः एमाले नेतृत्वया न्हूगु गठबन्धन दयेकुसें माओवादी केन्द्रया अध्यक्ष पुष्पकमल दाहाल ‘प्रचण्ड’ प्रधानमन्त्री जुयादीगु दु । प्रतिनिधि त्याना वःगु न्हय्गू दलया १६६ म्ह सांसदया समर्थन कासें अध्यक्ष दाहाल प्रधानमन्त्री जुयादीगु खः ।

दाहालयात राष्ट्रपति विद्यादेवी भण्डारीं म्हिगः प्रधानमन्त्री नियुक्त यानादीगु दु । थौं सनिलया ४ बजे वय्कःयात पद व गोपनीयताया शपथ ग्रहण याकीगु ज्याझ्वः दु ।

न्हूगु सरकार गठनया लागिं दाहालं म्हिगः नेपाली कांग्रेसया सभापति शेरबहादुर देउवायालिसे ताःहाकः हे वार्ता यानादीगु खःसां देउवां प्रधानमन्त्री पद त्वःते मखु धकाः अडान कायेवं दाहाल बालुवाटारं तप्यंक हे बालकोट वनाः एमाले अध्यक्ष केपी ओलीलिसे खँल्हाबल्हा यानादीगु खः । ओलीलिसे खँल्हाबल्हा यायां हे अन रास्वपा व जसपाया नेतातय्त नं सःतूगु खःसा वयां लिपा जनमत पार्टी व नागरिक उन्मुक्ति पार्टीया नेतातय्त नं सःताः न्हय्गू दलया गठबन्धन दयेकूगु खः । वयां लिपा अन हे दाहालया नेतृत्वय् सरकार गठन यायेगु सहमति जूगु खः ।

माओवादी व एमालेया दथुइ नं बछि बछि कार्यकाल पालंपाः सरकार चले यायेगु सहमति जूगु दु । न्हापांखुसी दाहालं सरकार चले याइया निदँत्या लिपा एमालें सरकार चले यायेगु सहमति जूगु दु । अथे हे पद बाँडफाँडय् नं एमालें राष्ट्रपति व सभामुख पद थम्हं कायेगु सहमति याःगु दु । मन्त्रीतय् विभाजनया खँ धाःसा जूगु मदुनि ।

निगू पार्टी दथुइ पद कालबिल जूसां बाँकी न्यागू पार्टीयात छु बीगु धइगु खँ धाःसा पिहां मवःनि । रवि लामिछानेया रास्वपां थःपिंत उपप्रधानमन्त्री पद बीमाः धकाः दावी यायेधुंकूगु दु । यदि रास्वपायात उपप्रधानमन्त्री पद बिल धाःसा मेगु दलतय्त नं वहे पद बीमालीगु अवस्था वयेफु धाःगु दु ।

थ्वहे झ्वलय् नेकपा एकीकृत समाजवादीं न्हूगु गठबन्धनया सरकारय् थःपिं मवनेगु खँ धाःगु दु । म्हिगः हे दाहालयात प्रधानमन्त्री दयेकेगु विषयसं एमाले सहितया दलत लिसे सहमति याःगु खः । दाहालया नेतृत्वया सरकार दयेकेगु निर्णय जुइवं नेकपा एसया सचिवालय बैठक च्वंगु खः । लिपांगु विकसित घटनाक्रमयात गम्भीरतापूर्वक कायेगु व पाय्छिगु इलय् उपयुक्त धापू दयेकेगु खँ नं उगु पार्टीं धाःगु दु ।