प्रदेश सरकारं हयेत्यंगु अध्यादेश निर्वाचन आयोगं पन
येँ (नेपालभाषा टाइम्स)÷निर्वाचन आयोगं बागमति प्रदेशया मुख्यमन्त्री व प्रमुख सचिवयात प्रदेशं जारी याःगु अध्यादेश बारे स्पष्टीकरण न्यंगु दु । लिसे आयोगं प्रदेशया आन्तरिक मामिला तथा कानुन मन्त्रालययात अध्यादेश राजपत्रय् पिमथनेत नं निर्देशन बिउगु दु । राजपत्रय् पिहां मवःतले अध्यादेश कार्यान्वयन याये मफइगु जूगु दु ।
निर्वाच्न आयोगया आदेश लिपा आः संघीय व प्रदेश सरकारं जारी याइगु अध्यादेशयात पनेगु तयारी कथं आयोगया निर्देशन वःगु अनुमान दु । निर्वाचन आयोगं प्रदेश सरकारयात जारी याःगु निर्देशन संघीय सरकारयात नं आकर्षित जूगु खँ धाःगु दु ।
बागमति प्रदेश सरकारं प्रदेश हस्तकलाग्राम स्थापना व सञ्चालन सम्बन्धय् व्यवस्था यायेत दयेकूगु अध्यादेश व प्रदेशया कृषि विकास सम्बन्धी अध्यादेश स्वीकृत यानाः जारी याःगु खः । उकियात कयाः आयोगं मुख्यमन्त्री व प्रमुख सचिवयात नीप्यघौया स्पष्टीकरण बीगु कथं न्यनेगु लिसें राजपत्रय् पिमथनेत निर्देशन बिउगु खः । थ्व स्वयां न्ह्यः संघीय सरकारं वंगु वालय् सम्पत्ति शुद्धीकरण लिसे सम्बन्धित छुं नेपाल ऐन संशोधन यायेत दयेकूगु अध्यादेश मन्त्रिपरिषदं स्वीकृत यानाः जारी यायेगु नितिं राष्ट्रपति कार्यालय छ्वःगु खः । उकियात कयाः नं उजुरी लाःगु धासें राष्ट्रपति कार्यालयं अध्यादेश जारी मयाःनि ।
सरकारं दावी याःथें सम्पत्ति शुद्धीकरणया बारे नेपालं याःगु कुतः ‘एसिस्मेट’ यायेत अन्तर्राष्ट्रिय पुचः नेपाः वयेत्यंगु दु । उकिया हे पूर्वतयारी कथं सम्पत्ति शुद्धीकरण सम्बन्धी विद्यमान कानुन परिमार्जन यानाः थप प्रभावकारी दयेकेगु कुतः यानाच्वंगु क्यनेगु नितिं सरकारं अध्यादेश हयेत्यंगु खः ।
थ्व स्वयां न्ह्यः कानुनमन्त्री गोविन्द बन्दीया पालय् सम्पत्ति शुद्धीकरणलिसे सम्बन्धित छुं नेपाल ऐन संशोधन यायेत दयेकूगु विधेयक संघीय संसदय् पेश याःगु खः । प्रतिनिधिसभां विधेयक पारित जूसां नं राष्ट्रियसभाय् उगु विधेयक थानाच्वंगु दु ।
LEAVE YOUR COMMENTS