विप्लवया कमाण्डर ज्वन

येँ – महानगरीय प्रहरी वृत्त थानकोटं अटोमेटिक पेस्तोल निपु व उकिया २० राउन्ड गोली सहित विप्लव पुचःया स्पेशल टाक्स फोर्स ‘एसटीएफ’ दुजःयात ज्वंगु दु । ज्वंम्ह मुनाल धाइम्ह सुलभ लामा खः । धादिङं येँय् वयाच्वंगु बा. २ ख १९८० नम्बरया बस जाँच यायेगु झ्वलय् बसय् च्वना वःम्ह लामाया झोला जाँचे यायेगु झ्वलय् सुचुका तःगु पेस्तोल व गोली लूगु खः ।

लामापाखें उषा च्वयातःगु ९० एमएलया चिकंया बोटलय् निपु पेस्तोल, बाइनाकुलर छगू, मोबाइल न्यागः व थीथी मनूतय् सम्पर्क नम्बर दुगु डायरी व भ्वं बरामद याःगु खँ प्रहरीं धाःगु दु । प्रहरीया कथं ज्वंम्ह लामा कमान्डो तालिम कयातम्ह हार्डकोड कार्यकर्ता खः । अथे जुयाः प्रहरीयात छुं नं बयान बियाच्वंगु मदु । प्रहरीं लामाया नेटवर्क सु सु लिसे दु धकाः मालेगु ज्या यानाच्वंगु दु ।