स्वस्थ सहरया निंतिं बजेट तर्जुमा यानागु दु ः उपप्रमुख डंगोल
येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलं येँ देय्यात स्वस्थ सहरय् रुपान्तरण यायेत येँ महानगरं आवश्यक नीति, कार्यक्रम व बजेटया व्यवस्था याःगु खँ धयादीगु दु । उपप्रमुख डंगोलं येँ देय्यात स्वस्थ सहरय् रुपान्तरण यायेत येँ महानगरपालिकां उपयुक्त नीतिगत प्रबन्धलिसें उकियात कार्यान्वयन यायेत ज्याझ्वः व बजेट तर्जुमा याःगु धयादीगु खः ।
महानगरपालिकाया ग्वाहालिइ राष्ट्रिय युवा गैरसरकारी संस्था महासंघं ग्वसाः ग्वःगु ‘स्वस्थ सहरया निंतिं साझेदारी’ विषयय् जूगु कार्यशालाय् नवासें वय्कलं उगु खँ धयादीगु खः । महानगर उपप्रमुख डंगोलं ज्याझ्वःयात प्राथमिकता दुने नं प्राथमिकता बीत महानगरया ‘गौरवया योजना’, ‘स्वर्णिम योजना’ नं समावेश यानागु खँ धयादीगु दु ।
महानगरया प्रवक्तालिसें १७ वडाअध्यक्ष नविन मानन्धरं येँ देय्यात पर्यावरणमैत्री सहरया रुपय् विकास यायेगु येँ महानगरया नीति जूगु व थ्वलिसे सम्बन्धित ज्याझ्वःत कार्यान्वयन यायेगु ज्याय् सहभागिताया निंतिं आह्वान यानादिल ।
प्रमुख प्रशासकीय अधिकृत वसन्त अधिकारीं अन्तर हृदयया चाहना यानातःगु ज्याझ्वःया लिच्वः याकनं वइ धासें वायु प्रदूषण नियन्त्रणया ज्यापाखें याकनं महसुस याये फइकथंया लिच्वः पिहां वइगु अपेक्षा यानादिल ।
येँ महानगरया स्वास्थ्य सल्लाहकार डा. जगदिश अग्रवालं वायु प्रदूषण नियन्त्रण जुल धाःसा उकिया लबः स्वास्थ्य व वातावरण जक मखसे आर्थिक व सामाजिक क्षेत्रय् नं समान रुपं वितरण जुइ धयादिल ।
वातावरण व्यवस्थापन विभागया प्रमुख रविनमान श्रेष्ठं वायु गुणस्तर सुधारया निंतिं पलाः न्ह्याकेमाःगु आवश्यक जूगु खँय् बःबियादिसें स्वस्थ सहर निर्माणया निंतिं साझेदारी यानागु जानकारी बियादिल ।
कार्यशालाय् वन तथा वातावरण मन्त्रालय, विश्वविद्यालयया प्राध्यापक, महानगर क्षेत्र दुने वायु गुणस्तर मापन व वायु गुणस्तर सुधारया ज्याय् सक्रिय गैरसरकारी व सामाजिक संघसंस्थाया प्रतिनिधिलिसें वातावरण ख्यःया विज्ञतय् सहभागिता दुगु खः ।
LEAVE YOUR COMMENTS