जन्मसिद्ध नागरिकताय् ट्रम्पया न्हूगु आदेश

एपी – अमेरिकी राष्ट्रपति डोनाल्ड ट्रम्पं अमेरिकाय् जन्म जूम्हं मनुखं स्वतः अमेरिकी नागरिका काये दइगु व्यवस्था (जन्मसिद्ध नागरिकता)या अधिकारयात सीमित यायेगु निंतिं न्हूगु कार्यकारी आदेश जारी याःगु दु । राष्ट्रपति ट्रम्पं अमेरिकाय् बूपिं मस्ततय्त बीगु जन्मसिद्ध नागरिकता अधिकारया व्यवस्था सीमित यायेगु निंतिं निगू कार्यकारी आदेश हःगु खः ।

छु इ न्ह्यः जक ट्रम्पं थज्याःगु हे कुतः याःगु खःसा उकियात सर्वोच्च अदालतं पना बिउगु खः । अथे खःसां ट्रम्पं न्हूगु कार्यकारी आदेशपाखें हाकनं उगु विषयय् न्ह्यःने हःगु खः ।

ट्रम्पं विहीवाः आप्रवासनसम्बन्धी निगू कार्यकारी आदेशय् ल्हाःचिं तयेगु घोषणा याःगु खः उकीमध्ये छगू आदेश अमेरिकाय् जन्म जूपिंत नागरिकता प्राप्त यायेगु अधिकारयात सीमित यायेगु उद्देश्यं हःगु खः ।

न्हूगु आदेशमध्ये न्हापांगुलिइ अमेरिकाय् जन्म जूपिं छुं मस्तय्सं स्वतः अमेरिकी नागरिकता काये मदइगु अवस्थाया दायरायात तःचाः याःगु दुसा निगूगु आदेशय् ‘बर्थ टुरिजम’ धकाः अमेरिकी नागरिकता कायेगु उद्देश्यं अमेरिकाय् मचा बुइकेत वयेगु अभ्यासय् प्रतिबन्ध तःगु दु ।