कुलमान वनेवं इन्भर्टर व्यापार अप्वल

येँ (नेपालभाषा टाइम्स) – नेपाल विद्युत प्राधिकरणं कुलमान घिसिङ कार्यकाल सिधयेकाः पिहां वंगु सीदयेक हे बजारय् इन्भर्टर व ब्याट्री न्याः वइपिं मनूत अप्वःगु दु। विद्युत व्यवसायीतय्सं धाः कथं वंगु निवाः न्ह्यवंनिसें न्हूगु ब्याट्री व इन्भर्टर न्याः वइपिं मनूतय् ल्याः ह्वाराक्क हे अप्वया वःगु खः ।

अप्वःसिनं थुकिया कारण कुलमान घिसिङयात सरकारं हानं लिसा कयाः नियुक्ति याइगु सम्भावना म्हो जुया वंगु खँलिसे स्वाना हःगु दु। छखे घिसिङया कार्यकाल थपे यायेगु मखु धकाः सरकारं अडान कायेगु व मेखे थ्वहे इलय् झाःझाः मत सीगु क्रम अप्वया वयेवं सर्वसाधारण जनता आः हानं न्हापा थें हे लोडशेडिङ जुइगु जुल धकाः ग्यानाः ब्याट्री व इन्भर्टर न्याः वयाच्वंगु अनुमान व्यवसायीतय्सं याःगु दु ।

थौंकन्हय् स्वनिगःया फुक्क धइथें स्कुलय् अनलाइन कक्षा सञ्चालन जुयाच्वंगु व थज्याःगु इलय् झाःझाः मत सीगु जुइवं ब्वनेज्याय् लिच्वः लात धकाः मनूत इन्र्भटर वा ब्याट्री न्यायेत ब्वाँय् जुयाच्वंगु खँ नं धाःगु दु। कक्षा जुयाच्वंगु इलय् मत सित धाःसा शिक्षकतय्सं नं वास्ता मयाइगु कारणं मस्तय्त आखः ब्वंकेगु लागिं जूसां बाध्य जुयाः इन्भर्टर न्याये मालाच्वंगु खँ अभिभावकतय्सं धायेगु यानाच्वंगु दु । थ्व कारणं यानाः नं बजारय् इन्भर्टरया माग अप्वःगु अनुमान दु ।

वंगु छुं न्हि न्ह्यवंनिसें झाःझाः मत वनाच्वंगुलिं सरकार नं चिन्तित जुयाः उर्जा मन्त्री वर्षमान पुनं प्राधिकरणया जिम्मेवार हाकीमतय्त मन्त्रालयय् सःताः थुकी गम्भीर जुयाः ध्यान बीत इनाप याःगु खः । सरकारं निर्देशन बिउसां म्हिगः नं स्वनिगःया थाय्थासय् मत सीगु खँ सीदुगु दु ।

स्कूलय् अनलाइन कक्षा शुरु जुइवं विद्यार्थीतय्त मदयेक मगाःगु जुयाः थौंकन्हय् बजारय् मोबाइल व ल्यापटब तकं न्यायेगु मदयाच्वंगु दु। मोबाइल व ल्यापटबया माग अप्वःगुलिं थौंकन्हय् पुलांगु ल्यापटब तकं तये मलानाच्वंगु खँ व्यवसायीतय्सं धाःगु दु ।