लुँया भाः प्यदँया दुने दकलय् अप्वः

येँ – लुँ वह बजारय् प्यदँया दुने दकलय् अप्वः लुँया भाः कायम जूगु दु । म्हिगः लुँ तोला ५८५०० तकां कारोबार जूगु खँ नेपाल सुनचाँदी व्यवसायी संघं धाःगु दु । वंगु छवाःया दुने लँया भाः १ हजार ३ तकां थहां वंगु दु । महासंघया कथं अन्तर्राष्ट्रिय बजारय् लुँया भाः थहांवंगुलिं नेपालय् नं उकिया लिच्वः लाःगु खनेदु । थ्व स्वयां न्ह्यः २०७० सालय् लँुया भाः दकलय् थिकेगु खः । २०७० साल सालया भदौ महिनाय् लँया भाः ६३ हजार ३ सय तका थ्यंगु खः । वयां लिपा २०७२ सालया माघ महिनाय् लुँया भाः तोलाया ५५ हजार ५ सय तक थ्यंगु खः । आः थहां वंगु लुँया भाः प्यदँया हे दकलय् अप्वः जूगु खँ महासंघं धाःगु दु । अथेहे वहःया भाः नं छुं भचा थहां वंगु दु । महासंघया कथं वहः प्रतितोला ७ सय ४५ तकां कारोबार जुयाच्वंगु दु । अमेरिका व चीन दथुइ ट्रेड वारया खतरा अप्वःगुलिं यानाः अन्तर्राष्ट्रिय बजारय् लगानीकर्तातय्सं लुँइ लगानी अप्वयेकूगुलिं यानाः लुँया भाः थहां वंगु अनुमान जुयाच्वंगु दु । अन्तर्राष्ट्रिय बजारय् उतारचढाव वइगु इलय् लुँइ लगानी यायेगु सुरक्षित जुइधइगु विश्वासं थुकी लगानी यायेगु यानाच्वंगु दु ।