जनप्रतिनिधितय्‌त दीप्याखंया समस्या न्ह्यब्वल

येँ- येँयाःया झ्वलय् जक पिहां वइगु थनया किलाघः त्वाःया दीप्याखंया सरोकारवालातय्सं नवनिर्वाचित जनप्रतिनिधि समक्ष थःपिनिगु समस्या न्ह्यब्वःगु दु ।
देवी नाच प्रवद्र्धन समितिपाखें परापूर्वकालंनिसें न्ह्याना वयाच्वंगु प्याखंयात आः वयाः व्यवस्थित रुपं संचालन यायेत थाकुया वःगु धासें थःपिनिगु समस्या न्ह्यब्वःगु खः । प्रतिनिधिसभा व प्रदेशसभाय् निर्वाचित जनप्रतिनिधियात भिंतुना देछायेगु झ्वलय् समितिं प्याखं संचालन यायेत वयाच्वंगु थीथी समस्यायात कयाः जनप्रतिनिधियात जानकारी याकूगु खः ।

दीप्याखंया गुरु इन्द्र महर्जनया संयोजकत्वय् किलाघः त्वालं दँय्‌दसं येँयाःया इलय् दीप्याखं पिथनेगु याना वयाच्वंगु दु । दीप्याखं संचालनया निंतिं थःपिंसं नं थःगु थासं गाक्कं कुतः याना वयाच्वनागु धासें गुथिया दुजः नरेन्द्र महर्जनं समस्या समाधानया निंतिं पहल यानाबीत निर्वाचित जनप्रतिनिधियात इनाप यानादिल । वय्कलं प्याखं संचालनया निंतिं आर्थिक समस्यानिसें कयाः प्याखं हुइकेगु थासय् तकं समस्या जूगु बारे जानकारी याकादीगु खः ।

सम्मान ज्याझ्वलय् झायादीपिं येँ क्षेत्र नं. ७ पाखें प्रतिनिधिसभाय् निर्वाचित रामवीर मानन्धर, क्षेत्र नं. ८ पाखें निर्वाचित जीवनराम श्रेष्ठ अथे हे प्रदेशसभाय् क्षेत्र नं. ७ (१) पाखें निर्वाचित बसन्त मानन्धर, क्षेत्र नं ८ (१)या राजेश शाक्यपिंसं दीप्याखंया समस्यायात कयाः थःथःगु थासं माःकथंया ग्वाहालिया निंतिं प्रतिवद्धता प्वंकादीगु खः । ज्याझ्वलय् पुलांम्ह सांसद प्रभादेवी वज्राचार्य, १५ वडाअध्यक्ष ईश्वरमान डंगोल, १८ वडाअध्यक्ष न्हुछेकाजी महर्जन, वडासदस्य हिराशोभा महर्जन लगायतपिनिगु उपस्थिति दुु खः ।