बुंगद्यः २४ गते रथय् बिज्याकेगु तयारी

येँ – बुंगद्यःया जात्राया निंतिं वइगु असार २४ गते रथय् बिज्याकेगु तयारी जुयाच्वंगु दु । दैवज्ञ ज्योतिष कीर्तिमदन जोशीं थःपिंसं वइगु असार २४ गते बुंगद्यःयात रथय् बिज्याकेगु बांलागु न्हि खः धकाः सम्बन्धित निकाययात सिफारिस यायेधुनागु खँ कनादीगु दु ।

बुंगद्यःया रथ दयेकेगु ज्या असार १० गते निसें न्ह्यायेधुंकूगु दु । आः असार २३ गते दुने हे रथ दयेके क्वचायेके कथं ज्या न्ह्यानाच्वंगु दु । बुंगद्यःयात रथय् बिज्याकेगु बांलाःगु न्हि २४ गते जूगुलिं असार २३ गते दुने हे रथ दयेके क्वचायेकेगुतयारी जूगु खः । ज्योतिष जोशीं २४ गते द्यःयात रथय् बिज्याके मफुत धाःसा मेगु ई झन् लिबावनीगु खँ धयादीगु दु ।

बुंगद्यःयात रथय् बिज्याकेगु निंतिं साइत हे थ्यंक स्वयेम्वाःगु धासें वय्कलं २४ गथे द्यः रथय् बिज्याकेगु बांलाःगु न्हि जूगुलिं थःपिसं सुझाव जक बियागु खँ नं स्पष्ट यानादीगु दु । वय्कलं धयादीगु दु, ‘द्यः रथय् बिज्याकेत साइत बीम्वाः, भिंगु न्हि लाकाः द्यः सालेमाः, अज्याःगु भिंगु न्हिं धइगु वइगु २४ गते खः ।’

वय्कलं आपालं श्रद्धालु भक्तजनपिंसं जात्रा यायेमाः धयाच्वंगु व रथ दयेकीपिं थीथी गुथिया गुथियारपिं नं इलय् जात्रा यायेमाः धकाः न्ह्याः वयाच्वंगुलिं २४ गते हे द्यःयात रथय् बिज्याकीगु आशा ब्वलंगु खँ नं कनादीगु दु ।