उत्तर कोरियापाखें न्हूकथंया क्षेप्यास्त्र परीक्षण

उत्तर कोरियां निगः चिहाकःगु दूरीया क्षेप्यास्त्र समुद्रं प्रहार याःगु दु । दक्षिण कोरियाया सेनां थुकिया पुष्टि याःगु दु । दक्षिण कोरियाली सेना प्रमुखं बिहिवाः सुथय् थ्व क्षेप्यास्त्र उत्तर कोरियाया पूर्वय् लाःगु ओन्सानं प्रक्षेपण याःगु खँ धाःगु दु । छम्ह अधिकारीया कथं ६९० किलोमिटर तापाक थ्यंगु थ्व क्षेप्यास्त्र न्हूकथंया खः ।

वंगु महिनाय् अमेरिकी राष्ट्रपति डोनाल्ड ट्रम्पलिसे किम जङ अनं निगू कोरियाया सीमाय् आकाझाकां नापलायेधुंकाः उत्तर कोरियां न्हापांखुसी क्षेप्यास्त्र कयेकूगु खः । अमेरिकां दँय्दसं दक्षिण कोरियालिसे जानाः मंकाः सैन्य अभ्यास याना वयाच्वंगुयात कयाः उत्तर कोरियां आक्रामक प्रतिक्रिया बीधुंकाः थ्व क्षेप्यास्त्र परीक्षण याःगु खः ।

उत्तर कोरियां थ्व सैन्य अभ्यासं पारमाणविक निशस्त्रीकरण वार्ताय् लिच्वः लाकेफु धयावयाच्वंगु खः । उत्तर कोरियां वइगु महिनाय् जुइत्यंगु अमेरिका–दक्षिण कोरियाया मंकाः सैन्य अभ्यासया भत्र्सना नं याःगु दु । थुकियात वंगु दँय् किम व ट्रम्प दथुइ जूगु वार्ता लिपा पिहां वःगु मंकाः वक्तव्यया मर्म अःखः जूगु खँ धाःगु दु ।

अमेरिका व दक्षिण कोरियां धाःसा अभ्यास मदिकूसां थुकियात न्हापा स्वयां चिंधंक जक याइगु जूगु दु । दक्षिण कोरियाया कथं बिहिवाः सुथय् ५ः३४य् न्हापांगु क्षेत्रप्यास्त्र कयेकूगु खःसा ५ः५७ य् मेगु क्षेप्यास्त्र कयेकूगु खः । सुरुइ थ्व निगुलं क्षेप्यास्त्र थ्यंमथ्यं ४३० किलामिटर तापाक व ५० किलामिटर उचाइय् थ्यनेधुंकाः सी अफ जापान धाइगु पूर्वी समुद्रय् कुतुं वंगु खः ।

तर दक्षिण कोरिया व अमेरिकां याःगु विश्लेषण धुंकाः थुपिं निगः मध्ये छगः न्हूकथंया क्षेप्यास्त्र जूगु खँ धाःगु दु । मेखे जापानया रक्षमन्त्री थुपिं क्षेप्यास्त्र जापानी समुद्रया सीमाय् मथ्यंगु व राष्ट्रिय सुरक्षाय् तत्काल छुं नं खतरा मदुगु खँ धाःगु दु ।