
एजेन्सी – चीनय् हाकनं कोरोना भाइरसया न्हूपिं संक्रमितत लूगु दु। चिनिया जनस्वास्थ्य अधिकारीतय्सं चीन दुने हे न्हूगु संक्रमणया घटना खनेदुगु खँ धाःगु दु। चिनिया अधिकारीतय् कथं शनिवाः जक चीनय् ८० म्ह न्हूपिं संक्रमितत खनेदुगु खः । थुपिं मध्ये ६५ म्ह स्वदेशय् च्वनाच्वंपिं खःसा झिंन्याम्ह पिनें चीन दुहां वःपिं जूगुखँ धाःगु दु ।
चीन दुने च्वनाच्वंपिंके हे संक्रमण खनेदय्वं चीनं हाकनं परीक्षणयात ज्या तच्वःगु गतिं न्ह्याकूगु दु। कोरोना संक्रमण जुयाः लनेधुंकूपिंत नं हाकनं स्वास्थ्य जाँच सुरु याःगु दु। हाकनं कोरोना जुइफुगु सम्भावनायात ध्यानय् तयाः थ्व पलाः न्ह्याकूगु खः । शनिवाः लुइकूपिं संक्रमितत चीनया हुबे प्रान्तया नागरिकत अप्वःलाःगवु दु। थ्व लागाय् थौंकन्हय् स्थानीय स्तरय् संक्रमण अप्वः खनेदयाच्वंगु दु । अथेहे हेलिङजाङ, हेइबेइ लागाय् नं यक्व संक्रमितत खनेदयाच्वंगु खँ स्थानीय अधिकारीतय्सं धाःगु दु ।
मेखे बेलायतय् धाःसा संक्रमितत सीगु ल्याः अप्वया वनाच्वंगु दु। थन न्हू प्रजातिया भाइरस संक्रमण तच्वया वयेवं सीपिनि ल्याः नं अप्वया वःगु खँ धाःगु दु। बेलायतय् दकलय् न्हापां खनेदुगु धाःसा न्हू प्रजातिया भाइरस थौंकन्हय् ६० गू देशय् न्यना वनेधुंकूगु दु। विश्व स्वास्थ्य संगठनं बुधवाः बिउगु जानकारी कथं थ्व भाइरस विश्वया यक्व देशय् थ्यनेधुंकूगु व थ्व न्हापाया भाइरस स्वयां घातक जूगु खँ धाःगु दु ।
LEAVE YOUR COMMENTS