थुकथं क्वचाल स्वक्वःगु नेपालभाषा साहित्य नखः

नेपालभाषा साहित्य ख्यःया विकास, प्रचारप्रसार, पुलांपिं व न्हूपुस्ताया साहित्यकार छगू हे थासय् हयाः साहित्यया ख्यःयात अझ चकंका यंकेगु, नेपालभाषा साहित्य ख्यःया म्हिगः व थौंया अवस्था अले कन्हय्या दिनय् यायेमाःगु ज्या, समस्या, अवसर, चुनौति, थीथी ख्यलं थुकिया विकासया निंतिं म्हिताच्वंगु भूमिका लगायत आपालं विषयय् न्हिछियंकं सहलह यायेगु, च्वसु ब्वनेगु व न्यनेगु, साहित्यिक सफू पितब्वज्या व सफू न्यायेगु व मूलतः छगू हे थासय् साहित्यया थीथी सवाः कायेगु ल्याखं वंगु स्वदँ न्ह्यवंनिसें न्ह्यानाच्वंगु नेपालभाषा साहित्य नखःया स्वंगूगु संस्करण नकतिनि हे क्वचाल ।

सन्ध्या टाइम्स पिथना प्रा.लि.या लुखां पिदनाच्वंगु ‘नेपालभाषा टाइम्स’ न्हिपौया ग्वसालय् थनिं निदँ न्ह्यः यलया केशवनारायण चुकय् जूगु न्हापांगु नेपालभाषा साहित्य नखःया वाङ्मय शताब्दीपुरुष सत्यमोहन जोशीं उलेज्या यानादीगु खः । अबलय् नेपालभाषा आन्दोलनया न्ह्यलुवा मल्ल के. सुन्दरया उपन्यास ‘द पोष्टर’ व कवि वसन्त चौधरीया नेपालभाषां अनुदित चिनाखँ सफू ‘वसन्त’या पितब्वज्या जूगु खः ।

अनंलि थगुने निक्वःगु नेपालभाषा साहित्य नखः यलया केशवनारायण चुक दुने च्वंगु भन्दाः क्यबय् जूगु खःसा उलेज्या येँ महानगरपालिकाया प्रमुख विद्यासुन्दर शाक्य व यल महानगरपालिकाया प्रमुख चिरिबाबु महर्जनं मंकाःकथं यानादीगु खः । निक्वःगु साहित्य नखतय् बाखं च्वमिलिसें गजलकार भूषणप्रसाद श्रेष्ठया ‘१०१ छन्द व १०१ गजल’, नियात्राकार राजेन मानन्धरया उपन्यास ‘हलहल बुंगद्यः’ व समालोचक लिसे कोशकार इन्द्र मालीया ‘नेपालभाषाया यासुधुकू’ यानाः स्वंगू सफू पितब्वज्या जूगु खः ।

स्वक्वःगु नेपालभाषा साहित्य नखः ग्वसाःखलः ‘सन्ध्या टाइम्स पिथना प्रा.लि.’लिसें ग्वसाःखलःया नायः रमेशकाजी स्थापितया सभापतित्वय् न्ह्याःगु ज्याझ्वलय् ‘नेपालभाषा टाइम्स’ न्हिपौया सम्पादकनापं ग्वसाःखलःया न्वकु सुरेश मानन्धरं लसकुस यानादीगु खः ।
थुगुसी स्वक्वःगु नेपालभाषा साहित्य नखतय् खुम्ह स्रष्टाया न्हय्गू कृति छगू हे दबुलिइ पितब्वज्या जूगु जुल ।

नेपालभाषाया वरिष्ठ आख्यानकार मथुरा साय्मिया आत्मकथा सफू ‘साय्मि, जि मथुरा’, वरिष्ठ गजलकार भूषणप्रसाद श्रेष्ठया गजल मुना सफू ‘नुगःया गुनुगुनु’ नेपालभाषाया न्हापांम्ह जासुसी उपन्यासकार राज साय्मिया जासुसी उपन्यास ‘तुयुगु अजः’, साहित्यकारलिसें आधुनिक कवि राजेन्द्रकुमार महर्जन ‘पुता’या ‘गजलया सिद्धान्त व नेपालभाषाय् गजल’ व गजल मुना सफू ‘सुथया लिसः’, ‘कवि बासुदेव अधिकारीया नेपालभाषां अनुदित चिनाखँ मुना सफू ‘युरो स्पर्श’ व साहित्यकार उद्धव मास्केया नियात्रा सफू ‘छगू नन्द देशय् ….’ ज्याझ्वलय् पाहांकथं झायादीपिं छसिकथं येँ मनपाया मेयर शाक्य, नेपालभाषा मंकाः खलःया नायः लिसें जनकवि दुर्गालाल श्रेष्ठ, नेपालभाषा एकेदेमिया चान्सलर चित्तरञ्जन नेपाली, किपू नगरपालिकाया मेयर रमेश महर्जन, नेवाः न्ह्यलुवालिसें उपन्यासकार मल्ल के. सुन्दरं पितब्वज्या यानादीगु खः ।

पितब्वज्या जूगु न्हय्गुलिं सफूया समीक्षा मल्ल के. सुन्दरं यानादिल ।उलेज्याझ्वः व सफूया पितब्वज्या लिपा सफुलिइ स्रष्टापिनिगु ल्हाःचिं तयेगु ज्याझ्वः न्ह्याःगु खःसा अनंलि साहित्य नखःया प्रमुख आकर्षणमध्ये छगू पुचः सहलह अन्तर्गत न्हापांगु न्हि ‘नेपाल लिपिया पुनरुत्थान’ विषयय् अन्तक्र्रिया जूगु खः ।

निर्मल वज्राचार्य सहजकर्ता जुयादीगु सहलह÷अन्तक्र्रियाय् नेपाल लिपि गुथिया नायः निरञ्जन तबः, नेपाल लिपिया अभियन्ता सुनिता डंगोल, नेपाल लिपि सफ्ट वेयर डेभलपर सुयोग्यरत्न ताम्राकार व फन्टोग्राफर आनन्द महर्जनं नेपाल लिपिया प्रचार प्रसार, न्हू पुस्ताय् पुस्तान्तरण, भावी योजना आदि विषयय् थःथःगु विचाः न्ह्यब्वयादीगु खः ।

वयां लिपा मेगु सेशनय् नेपालभाषा साहित्य ख्यःया वरिष्ठ, नांजाःपिं व न्हूपिं यानाः झिंन्याम्ह स्रष्टापिंसं चिनाखँ, बाखं, गजल, च्वखँ लगायतया साहित्यिक रचना ब्वनाः न्यंकादिल । न्हापांगु न्हि जनकवि दुर्गालाल श्रेष्ठलिसें साहित्यकारपिं ओमनरहरि श्रेष्ठ, बासुदेव अधिकारी, लक्ष्मी माली, सुधीर ख्वबि, सुशील राजोपाध्याय, राज साय्मि, रेखा शाक्य, दिव्या ताम्राकार, रोनिका श्रेष्ठ, दिलीप शाही, सलिना महर्जन, लक्ष्मीकुमार महर्जन व महेशमान डंगोलं थःथःगु रचना पाठ यानादीगु खः ।

न्हापांगु न्हिया साहित्य नखःया दकलय् लिपांगु ब्वय् सांगीतिक ज्याझ्वलय् नेपालभाषाया नांजाःपिं म्येँ हालामिपिं रोजी डंगोल श्रेष्ठ, रानीशोभा महर्जनं नेपालभाषाया लोकंह्वाःगु म्येँ न्यंकादीगु खःसा नेपालभाषा आन्दोलनया नांजाःम्ह न्ह्यलुवालिसें साहित्यकार पद्मरत्न तुलाधरं च्वयादीगु, नांजाःम्ह निर्देशक रमेशकाजी स्थापितं निर्देशन यानादीगु शरद कसाः व कर्ण वज्राचार्यं म्हितादीगु ख्यालः ‘हुप्प–स्याप्प’ व विजय मानन्धर ‘स्माइलिंग फेसं’ च्वयादीगु अविनाशं निर्देशन यानादीगु भिमसेन रिसाल, अन्नपूर्णेश्वरी श्रेष्ठ, हरिमान दिवाकर, राजेश श्रेष्ठ, नानीमैयाँ प्रजापतिं म्हितादीगु ख्यालः ‘पराकम्प’ क्यनेज्या जूगु खः ।

अथे हे मेट्रो एफएमया संचारकःमि बैकुण्ठ भण्डारीं पुलांम्ह जुजु ज्ञानेन्द्र, नेकपाया अध्यक्ष पुष्पकमल दाहाल प्रचण्ड व कांग्रेस सभापति शेरबहादुर देउवां नेवाः भासं नवात धाःसा गुकथं नवाइ धकाः क्यारिकेचर न्ह्यब्वयादीगु खः । नेपालभाषा साहित्य नखःया निन्हुया न्हिया ज्याझ्वः नेपालभाषाया आख्यानकार मथुरा साय्मिलसे वय्कःया साहित्यिक यात्राया बारे न्यनेकने यासें न्ह्याःगु खः ।

पत्रकारलिसें साहित्यकार राजेन मानन्धरं न्ह्याकादीगु ज्याझ्वलय् वय्कःया साहित्यिक यात्राया आरोह अवरोहया बारे अन्तरंग खँ जूगु खः ।
वयां लिपा ‘भाषा साहित्यया विकासय् संकिपाया भूमिका’ विषययात कयाः पुचः सहलह जूगु खः । ल्याय्म्हम्ह चीहाः संकिपा निर्देशक राकेश महर्जन मध्यस्थकर्ता जुयादीगु सहलहय् वरिष्ठ सिने पत्रकार विजयरत्न असंबरे, नांजाःम्ह निर्देशक आर्यम नकःमि, बहुचर्चित संकिपा च्वापु फय्या निर्माता ओमचरण अमात्य व नेवाः नापं खय् भाय्या संकिपाया नांजाःम्ह नायिका आशिष्मा नकःमिं ब्वति कयादीगु खः ।

निन्हुया न्हिया च्वसु ब्वने ज्याझ्वलय् वरिष्ठ गजलकारलिसें बाखं च्वमि भूषणप्रसाद श्रेष्ठ, किपू नगरपालिकाया मेयर रमश महर्जनलिसें साहित्यकारपिं डा. पुष्पराज राजकर्णिकार, स्नेह साय्मि, महेन्द्रगोपाल कर्माचार्य, रजनी मिला, रामेश्वर मिश्रण श्रेष्ठ, राजेन्द्रकुमार ‘पुता’, कृष्णभक्त बोडे, रिता महर्जन, रामगोपाल आशुतोष, सुजिता माःजु, ज्ञानीराजा मानन्धर, मीना वज्राचार्य, दशराज शाक्य, रमेश मानन्धर, शोभा महर्जन, रेणु श्रेष्ठ, सारस चरी, हेमन्तिका आरएल पालिखे लगायतया पुलांपिं व न्हूपिं रचनाकारं साहित्य पाठ यानादीगु खः ।

निन्हुया न्हिया दकलय् लिपा न्ह्यकुन्हु म्येँ न्यंकादीपिं निम्ह कलाकारलिसें यमन श्रेष्ठ, न्ह्यकुन्हुया निपु ख्यालःलिसें नांजाःम्ह निर्देशक, च्वमि, कलाकार रामकृष्ण खड्गीं च्वयाः निर्देशन यानादीगु व वय्कः थःलिसें रजनी खड्गी, राजन शाही व रुपेन्द्र श्रेष्ठ थक्वामिं म्हितादीगु ख्यालः ‘यमराजया ममः’नापं व क्यारिकेचर न्ह्यब्वःगु खः ।

निन्हुया न्हिया ज्याझ्वलय् हे नकतिनि जक क्वचाःगु ‘नेपालभाषा चीहाः संकिपा कासा’य् उत्कृष्ट जुयादीपिं व ब्वति कयादीपिं सकसितं सहरी विकास राज्यमन्त्री रामवीर मानन्धरं दसिपौ, सिरपाःलिसें दां लःल्हानादीगु खः ।
#न्ह्यब्वःम्ह ः उदेन न्हूसाय्मि

सम्बन्धित बुखँ

LEAVE YOUR COMMENTS