थ्व खः जनताया सः

अमृतरत्न शाक्य

अय् नेता !
चुनाव न्ह्यः
छिं भोट फ्वंवःगु इलय्
जिमिसं छितः
स्वां फ्वः देछायाः
लसकुस याना ।
छिगु चाकु-माकु
खँ न्यनाः जि, जिगु परिवार
त्वाःया पासापिं जानाः
छितः त्याका नं छ्वया ।

छिगु विजय जुलुसय्
छितः स्वांमाः क्वखाकाः
लसकुस नं याना ।
छिगु कार्यकालया बच्छि ई फुत
ग्व जिमिगु त्वालय्
छु विकास जुल ?
न धः दयेकल न लँ
न लँया गाः हे पर्कल
न मेलम्चीया आसय्
गनावंगु कथु प्याकेत

लःया पाइप हे वल ।
छिगु चाकु-माकुगु खँ ला
फुक्कं बकंफुस्लुगु लानाच्वन ।
कोभिड-१९ देशय् वयेवं
छितः ला हाइसञ्चो हे जुल जुइ !
थुकियात हे क्यनाः
थःगु असफलता
त्वपुइ दइगु जुल
तर छिं स्यू लाकि मस्यू
थ्व हे ल्वचं
जिमिगु त्वालय्
ग्वंम्ह मंत
गुलि परिवार
बेसहारा जुल ?
थ्व ल्वय् पाखें बचय् जुइकेत

छिं थःगु पाखें छु याना दिया ?
व बेसहारा परिवारयात
छु ग्वाहालि यानादिया ?
ई बच्छि अझं ल्यं दनि
छिं बियागु बचं कथं ज्या यायेत
द्वंगु लँपु भिंकादिसँ
ज्या यानाः क्यनादिसँ
अय् नेता ! छितः लसकुस यायेत
जिं हानं नं स्वांमाः हने
थज्याःगु विषम इलय्
ल्वा जक ल्वानाः
गुलि ई सितिं छ्वयेगु ?
आः नं थःत
मभिंकल धाःसा
थःम्हं ब्यूगु बचं

पुमवंकल धाःसा
जि सुम्क च्वने मखु
भ्वाथःभिथःगु लाकां दक्वं मुना?
जि छिमिगु लुखाय् दं वये
छिमित लाकामं कयेकेगु जक मखु
व हे लाकांमाःहनाः
छिमित क्वखायेकेत
जि लिचिले मखु ।
म्हिगः स्वांमाः क्वखायेकागु थ्व ल्हातं
थौं लाकांमाः क्वखायेकेत
बाध्य यायेमते
आः ला सँन्ह्यलं चायेकि
गात थःथः ल्वाये
आः दे थकायेत जायेवा
आः देय्या दुश्मनतय्त
छधीछप्पँ जुयाः ख्याये वा ।

सम्बन्धित बुखँ

LEAVE YOUR COMMENTS