इन्फान्टिनोयात वेल्सं समर्थन लित काल
लन्दन -विश्व फुटबलया सर्वोच्च निकाय फिफाया अध्यक्ष जियानी इन्फान्टिनोयात बियातःगु समर्थन वेल्स राष्ट्रं लित काःगु दु । फिफा अध्यक्ष इन्फान्टिनोया पुनः निर्वाचन अभियानयात बियातःगु समर्थन वेल्स फुटबल एशोसियसन (डब्लुएफएं) लित काःगु खः ।
विश्वकप फुटबलय् निजी लगानी दुत हयेगु धकाः विवादास्पद प्रस्ताव व योजना असफल जुइवं सार्वजनिक रुपं समर्थन लित काःगु वेल्स न्हापांगु देय् जूगु दु । डब्लुएफएं फिफा अध्यक्ष इन्फान्टिनोयात मेगु कार्यकालया निंतिं नं समर्थन यायेगु धयातःगु खः ।
आः वयाः डब्लुएफएं सोमवाः छपु विज्ञप्ती जारी यासें सन् २०२७ निसें २०३१ तकया कार्यकालया निंतिं फिफा अध्यक्ष पदय् इन्फान्टिनोया उम्मेदवारीयात थःपिंसं समर्थन मयायेगु स्पष्ट याःगु दु । सुशासन, निर्णय प्रक्रिया, नेतृत्व, फिफाया मूल्य मान्यता, हितधारकलिसेया सम्बन्ध, संचार व लिपांगु इलय् निर्णण् क्षमताय् खनेदुग कमजोरीया कारणं इन्फान्टिनोप्रति थःपिनिगु विश्वास मदुगु डब्लुएफएं जारी याःगु विज्ञप्तीइ धयातःगु दु ।
डब्लुएफएं जारी याःगु विज्ञप्तीइ विश्व फुटबलया हितयात ध्यानय् तयाः न्हापांगु प्राथमिकता बीत व उकियात कायम याना तयेगु ज्याय् असफल जूगु स्वीकार्य जुइ फइमखु धइगु खँ न्ह्यथँसें थ्व हे कारणं थःपिंसं समर्थन लित कयागु खः धयातःगु दु ।
विश्व फुटबलया थीथी महासंघया थुकथंया विरोध लिपा फिफा अध्यक्ष इन्फान्टिनों औपचारिक रुपं हे उगु योजना लित काःगु खः । योजना लित काःसां नं थुकिं यानाः ब्वलंकूगु राजनीतिक धक्का व फिफाया नेतृत्वप्रतिया विश्वास धाःसा साम्य जूगु मदुनि ।
इन्फान्टिनोया योजनाकथं फिफाया २११ गू सदस्य राष्ट्रया फुटबल संघयात मिसा व मिजं विश्वकपलिसें मेमेगु प्रमुख कासाय् निजी लगानी दुत हयेगु योजनायात समर्थन यात धाःसा प्रत्येक फुटबल संघयात प्यंगू करोड अमेरिकी डलर उपलब्ध याकेगु प्रस्ताव नं याःगु खः ।
इन्फान्टिनोया थुगु प्रस्तावयात कयाः विशेषतः स्वंगू महादेशया फुटबल महासंघं कडा विरोध यायेवं उगु योजना लित काःगु खः ।
LEAVE YOUR COMMENTS