अन्ततः नेकपा एमाले विभाजित, नेपाल पक्षया न्हूगु पार्टी
- नेपालभाषा टाइम्स
- ???? ???????? एकादशी
- किपा-निर्वाचन आयोगय् पार्टी दर्ता यायेधुंकाः माधव पक्षाया नेता बेदुराम भुसाल संचारकःमिपिंलिसे । किपा ः रासस
येँ -ताः ईया विवाद लिपा अन्ततः नेकपा एमाले विभाजित जूगु दु । उगु पार्टीया वरिष्ठ नेता माधव नेपालया नेतृत्वय् म्हिगः निर्वाचन आयोगय् ‘नेकपा एमाले (समाजवादी)’ धइगु नां तयाः न्हूगु दल दर्ता याःगु खः ।
प्रम शेरबहादुर देउवाया सिफारिसय् राष्ट्रपति विद्यादेवी भण्डारीं दल विभाजन सम्बन्धी अध्यादेश जारी यायेवं नेपाल पक्षं न्हूगु पार्टी दर्ता याःगु खः । अध्यादेश माधव नेपाल पुचलं न्हूगु दल दर्ता याये छिनी कथंया प्रावधानत तयाः जारी याःगु खः । अध्यादेश कथं नेता नेपालं न्हूगु पार्टी दर्ता याःसां वय्कः पक्षधर सुयां नं सांसद पद वनी मखु ।
म्हीग जक एमाले अध्यक्ष केपी शर्मा ओलीं नेपाल पक्षया झिंप्यम्ह सांसदयात कारबाही यानाः संसद सचिवालययात पौ च्वयेवं वरिष्ठ नेता नेपालं थःपिंसं मेगु हे दल दर्ता यायेगु घोषणा यानादीगु खः ।
वय्कलं दर्ता यानादीगु न्हूगु पार्टीया अध्यक्ष कथं माधव नेपाल स्वयम् च्वनादीगु दुसा वरिष्ठ नेताया रुपय् झलनाथ खनाल च्वनादीगु दु ।
नेता नेपालं न्हूगु दल दर्ता यायेवं उकी च्वंपिं गुलिखे निगूगु पुस्ताया नेतातय्सं नेता नेपालया साथ त्वःतूगु दु । स्थायी कमिटीया दुजः मुकुन्द न्यौपाने, रघुजी पन्त, बेदुराम भुसाल धाःसा नेपाल पक्षय् वनेधुंकूगु दु ।
माधव नेपालया पार्टीइ ९५ म्ह
केन्द्रीय दुजः प्रस्ताव यानातःगु दु । ९५ म्ह केन्द्रीय दुजः मध्ये हाल एमालेय् दुपिं ५८ म्ह केन्द्रीय दुजःत नं दुथ्याःगु खँ धाःगु दु । उकथं हे एमालेय् दुपिं ३१ म्ह सांसदत नं एमाले समाजवादी पार्टीइ दुगु खँ नेता राजेन्द्र पाण्डें कनादीगु दु । एमाले समाजवादीया चुनाव चिं सफू वा च्वसा तयेगु धकाः प्रस्ताव याःगु खःसां थ्व चिं मेमेगु पार्टीतय्सं कया तयेधुंकूगु जूगुलिं आः न्हूगु हे चिं तइगु खँ दु ।
LEAVE YOUR COMMENTS