मासंगाः नेवाः पुचःया हनाज्याझ्वः

येँ- मासंगाः नेवाः पुचलं वंगु लक्ष्मीपुजाकुन्हु छगू ज्याझ्वःया दथुइ येँ महानगर २५ वडाअध्यक्ष नीलकाजी शाक्य व निगुलिं मोहदापाखें सगरमाथाया सफल आरोहण यानादीम्ह पत्रकार कल्पना महर्जनयात हनेज्या याःगु दु ।

पुचःया नायः नरेश महर्जनया सभापतित्वय् जूगु ज्याझ्वलय् विश्वया दकलय् तजाःगु च्वापुगुँ सगरमाथाया उत्तर व दक्षिण निगुलिं मोहदापाखें सफल आरोहण यानादीम्ह पत्रकार महर्जनयात नीन्याद्वः तका दांलिसें हनापौ लःल्हाःगु खः । सगरमाथाया सफल आरोहणलिसें वल्र्ड बुक अफ रेकर्डय् तकं थःगु नां दुथ्याकेत ताःलाःम्ह पत्रकार आरोही महर्जनयात पुचःया नायः महर्जनं हनापौ लःल्हानादीगु खःसा उगु इलय् नायः महर्जनं थःगु व्यक्तिगत रुपं नं नीन्याद्वः तका दां लःल्हानादीगु खः । आरोही महर्जनयात उगु इलय् गुथि अस्टे«लियापाखें प्राप्त छगू लख तका दां नं लःल्हाःगु खः ।

ज्याझ्वलय् येँ महानगरपालिका २५ वडाअध्यक्ष शाक्ययात नं हनापौ देछासे हनेज्या याःगु खः । वडाअध्यक्ष शाक्य नकतिनि क्वचाःगु नेपाली कांगे्रस येँ महानगर समितिया सभापति पदय् अत्याधिक मतं विजयी जुयादीगु लसताय् हनेज्या याःगु खः ।

पुचःया लिउ छ्याञ्जेलिसें लोकंह्वाःम्ह कलाकार राजु महर्जनं लसकुस यासें न्ह्याःगु ज्याझ्वलय् सम्मानित व्यक्तित्वपिंसं नं नुगःखँ तयादीगु खः ।