रेडियो झीगु सः सछिन्हु पूवन

येँ – रेडियो नेशन १०३.९ मेगाहर्जपाखें न्ह्यानाच्वंगु नेपालभाषा ज्याझ्वः ‘रेडियो झीगु सः’ सछिन्हु पूवंगु लसताय् छगू ज्याझ्वः जुल । झीगु सः पुचःया ग्वसालय् नेवाः संचार अभियानकथं थुगु ज्याझ्वः न्ह्याका वयाच्वंगु खः ।

रेडियो ज्याझ्वः सछिन्हु पूवंगु लसताय् पुचःया कजि विजयरत्न असंबरें २०५३ सालय् तत्कालीन इलय् रेडियो नेपालपाखें गुडनाइट एफएम थःपिनिगु हे कुतलं न्ह्याकते ताःलाःगु खँ कनादिल ।

रेडियो झीगु सः सकल ज्याझ्वः न्ह्याकामिलिसें न्यनामि व विज्ञापनदातापिनिगु कुतः व ग्वाहालिकथं हे ज्याझ्वः न्ह्याकेत तिबः चूलानाच्वंगु वय्कलं धयादिल ।

रेडियो नेशनया कजि पुरुषोत्तम बस्नेतं स्वनिगः नेवाःतय्गु म्हसीका दुगु थाय् खः धासें थःपिनिगु एफएम स्टेशनय् नं नेपालभाषाया ज्याझ्वः दुथ्याके खंगुलिं लसता प्वंकादिल ।

नेपालभाषा ज्याझ्वः न्यनामि जुजुभाई शाक्यं नं नुगःखँ तयादीगु ज्याझ्वलय् विशिष्ट पाहांकथं झायादीम्ह पुरुषोत्तम सुवेदीं ज्याझ्वः न्ह्याकेत थीथीकथं ग्वाहालि यानादीपिंत मतिनाया चिं लःल्हानादीगु खः ।

अथे हे झीगु सः रेडियो पुचःया नायः राजुराजदेव वज्राचार्य विशिष्ट पाहां सुवेदीयात खादा क्वखायेकाः व कजि असंबरें लुमन्ति चिं लःल्हानादीगु खः ।

पुचलं थःपिनिगु अभियानकथं नाइस टेलिभिजनय् झीगु सः, अनलाइन न्युजडटकम नं न्ह्याका वयाच्वंगु दु । रेडियो ज्याझ्वलय् आइतवाःनिसें शनिवाःतक संकिपा, फोन इन, उसाँय्, साहित्यिक, संगीतिक व मनोरञ्जनात्मक ज्याझ्वः न्ह्याका वयाच्वंगु दु ।