ने. सं. ११४४ चौलाथ्व दशमी -

पाहांचःह्रेया त्वाःत्वालय् मरःजा नकेगु नं बन्द

येँ – कोरोना भाइरसया महामारीयात ध्यानय् तयाः येँया थीथी जात्रा थुगुसी मन्यायेकीगु जूगु दु । थ्व झ्वलय् येँया युतुननि त्वालय् आमै (चैत ११ गते) कुन्हु पाहांचः¥हेया मरःजा मनकीगु जूगु दु । म्हिगः स्थानीय वासिन्दां थीथी थासय् सुचं तिकाः थुकिया जानकारी बिउगु खः । युतुननी मरःजा गुथिया छ्यांज्ये अष्टनारायण महर्जनं ल्हाःचिं तयाः उगु सुचं पित बिउगु खः ।

उकथं हे थुगुसी कंग अजिमायात नं खतय् तयाः जात्रा मयाइगु जूगु दु । द्यःछेँनं द्यःगमय् तक नं धकिइ जक द्यः तयाः द्यः यंकेगु तयारी जुयाच्वंगु खँ १८ वडाया वडाध्यक्ष न्हुच्छकाजी महर्जनं कनादीगु दु । वय्कःया कथं द्यःछेँनं गमय् तक यंकीबलय् नं छुं कथंया बाजं मयंकेगु ग्वसाः जुयाच्वंगु ।

थुगुसी चैत्रं जुइगु जनबहाःद्यःया जात्रा नं मयाइगु जूगु दु । सेतो मछिन्द्रनाथ रथयात्रा व्यवस्थापन समितिया संयोजक निलकाजी शाक्यं छगू वक्तव्य पिकासें कोरोना भाइरसया महामारीयात ध्यानय् तयाः थुगुसी जनबहाःद्यःया रथयात्रा स्थगित यानागु जानकारी बियादीगु खः । जात्राया झ्वलय् जनबहाःद्यःयात यायेमाःगु नित्यपुजा जक सम्पन्न याइगु खँ वय्कलं धयादीगु दु ।

थ्व झ्वलय् चैत्रया अन्तिमय् ख्वपय् तःजिक न्यायेकीगु बिस्काः जात्रा छु जुइ धइगु बारे धाःसा आः तक छुं निर्णय मजूनिगु खँ सीदुगु दु । स्थानीय सचेत मनूतय्सं बिस्काः जात्रा नं रथयात्रा मयासे द्यःयात थःने छक्वः व क्वःने छक्वः जक बिज्याकाः जात्रा सम्पन्न याये माली धकाः सुझाव बियाच्वंगु दुसां ख्वप नगरपालिका व जात्रा सम्बन्धी गुथितय्सं छुं निर्णय धाःसा याःगु मदुनि ।पाहांचः¥हेया त्वाःत्वालय्