किपुलिइ बृहत् नगर सफाइ अभियान

येँ – येँय् नं दक्षिण भेगय् लाःगु स्वनिगःया ऐतिहासिक नगर किपुलिइ बृहत् सफाइ अभियान शुरु जूगु दु । किपू नगरपालिकाया ग्वसालय् थीथी संघसंस्थाया सहकार्यय् जूगु सफाइ अभियान किपूया त्रिविवि ध्वाखां शुरु जूगु खः ।
नगर प्रमुख रमेश महर्जनया नेतृत्वय् जूगु अभियान किपूया लोकतान्त्रिक चोक, बाघभैरव, विष्णुदेवी, द्यःध्वाखा लगायत थीथी झिंगूगु थासय् किपूवासीत मुनाः सुचुकुचु यायेगु ज्या जूगु खः । उगु अभियानपाखें छन्हुया दुने हे २५ मेट्रिक टन स्वयां अप्वः फोहर व्यवस्थापन यायेगु ज्या जूगु खः । अभियानया झ्वलय् त्वाः, बहाः, चुक, ननिलिसें ऐतिहासिक महत्वया थाय्बाय् सम्पदा क्षेत्र, देगः, सतः, फल्चा आदि थासय् मुनाच्वंगु फोहर सुचुकुचु याःगु खः ।

सुरक्षाकःमि, थीथी पेशाकर्मि, स्थानीयवासी व थीथी संघसंस्थाया प्रतिनिधिनापं यानाः निद्वः स्वयां अप्वःया सहभागिताय् जूगु अभियानं किपू देय्यात फोहर व प्रदूषण मुक्त यायेगु प्रण अभियानय् सहभागिताय्सं याःगु दु । उगु इलय् नगरप्रमुख महर्जनं लिपांगु इलय् किपू नगर क्षेत्र दुने अप्वया वनाच्वंगु सहरीकरण व अव्यवस्थित बसोबासया कारणं दुर्गन्ध न्यना वनाच्वंगु वा किपूया वातावरण नं प्रदूषण जुया वनाच्वंगु खँय् चिउताः प्वंकादिसें मनूतय्सं जन्मनिसें मृत्युसंस्कारया इलय् तक पुजा, थीथी संस्कार, तीर्थस्थलया रुपय् म्हसीया वयाच्वंगु थीथी सम्पदास्थल, तुं, पुखू थेंज्याःगु लःया स्रोतलिसें सतकया जःखःया क्षेत्रय् सुचुकुचु याःगु यायेगु जानकारी बियादीगु खः ।