सरकारया न्हूगु रणनीति : अनिवार्य क्वारेन्टिन, नमूना परिक्षण व अस्पताल व्यवस्थापन

येँ – कोरोना भाइरस (कोभिड-१९)या संक्रमण रोकथामया निंतिं सरकारं न्हूगु रणनीतिक दयेकूगु दु । आः तक देय् लकडाउन यानाः प्रवेश रोकय् केन्द्रित जुयाच्वंगु सरकारं न्हूगु योजना सार्वजनिक याःगु दु । मंगलवाः न्हिनय् नियमित पत्रकार सम्मेलनय् स्वास्थ्य तथा जनसंख्या मन्त्रालयया प्रवत्ता डा. विकास देवकोटां आः सरकारं न्हूगु रणनीति नालायेगु खँ धयादीगु खः ।

वय्कःया कथं आः सरकारं शंकास्पद मनूतय्सं अनिवार्य रुपं क्वारेन्टिनया कार्यान्वयन यायेमाः । स्थानीय निकायं सोमवाः हे ४० हजार स्वयां अप्व मनूतय् धलः तयार यायेधुंकूगु जानकारी बियादिसें प्रवक्ता देवकोटां आः स्थानीय निकाय, सुरक्षाकर्मी व थः हे सतर्क जुयाः क्वारेन्टिनया कार्यान्वयन यायेगु ज्या जुइगु धयादिल ।

अथेहे मेगू रणनीति कथं कोरोनया नमूनाया दायरा तब्या यायेगु जानकारी नं वय्कलं बियादिल । विदेशं लिहांवःपिं, कोरोनाया लक्षण खनेदुपिं व शंकास्पद मनूतय् परिक्षण याइगु जूगु दु । प्रवत्ता देवकोटाया कथं आः तक येँ, धरान व पोखराय् परिक्षण यायेगु सुविधा दयेकेधुंकूगु व याकनं हे धनगढी, सुर्खेत, बुटवल, हेटौंडा व जनकपुरय् नं उपलब्ध जुइगु स्पष्ट यानादिल ।

स्वंगूगु रणनीति कथं अस्पतालया तयारी व व्यवस्थापनया चुस्त दयेकेगु खः । अस्पतालया अत्यावश्य जनशक्ति, आईसीयुया व्यवस्था, फिवर क्लिनिक लगायत सुरक्षा सामाग्रीया तयारी व व्यवस्थापन आःया प्राथमिकताय् लाःगु जानकारी नं मन्त्रालयया प्रवक्तां बियादिल ।

नेपालय् आः तक १०६०म्ह मनूतय् नमूना परिक्षण जुइधुंकूगु व उकी मध्ये प्यम्हेसित जक संक्रमण खनेदुगु खः । अथेहे संक्रमणया आशंकाय् येँ झिम्ह व पिने न्हय्न्हय्म्ह मनूत आईशोलेशनय् च्वनाच्वंगु जानकारी नं पत्रकार सम्मेलनय् बिउगु खः ।

(ने. सं. ११४० चौलाथ्व ७/ वि. सं २०७६ चैत १८ मंगलवाः)