बलात्कार उजुरीया हदम्याद मचीकीगु

येँ – बलात्कार व यौनजन्य हिंसाया घटनाय् उजुरी यायेगु हदम्याद तत्काल मचीकीगु जूगु दु । कानुन न्याय तथा संसदीय मामिला मन्त्री गोविन्द बन्दीं म्हिगः प्रतिनिधिसभाय् सांसदतय्सं न्यंगु न्ह्यसःया लिसः बिसें प्रचलित कानुनय् दुगु हदम्याद सम्बन्धी व्यवस्था तत्काल पुनर्विचार जुइ मफुइगु खँ धयादीगु खः ।

सम्बोधनया झ्वलय् वय्कलं छगू घटनायात कयाः हदम्याद सम्बन्धी सार्वजनिक बहस न्ह्यायेवं हदम्यादय् पुनर्विचार याये फइ मखु धासें धयादिल, ‘हदम्यादया कारणं न्यायपाखें बञ्चित जुइ म्वाःलेमा धइगु छिकपिनिगु भावनाय् सरकार गम्भीर दु । उकिं थुकियात गम्भीरतापूर्वक कयाः कानुन आयोगयात अध्ययन यायेत धायेधुनागु दु ।’

कानुन आयोगं सर्वोच्च अदालतं प्रतिपादन याःगु नजीर, थीथी देय्या हदम्याद सम्बन्धी प्रावधान व नेपाःया सामाजिक परिवेश तकं स्वयाः प्रतिवेदन बीगु व उकिया आधारय् जक सरकारं पुनर्विचार यायेगु खँ नं मन्त्री बन्दीं कनादीगु दु ।

कानुन दयेकेगु झ्वलय् यक्व विषयय् ध्यान बीमाः धासें कानुनमन्त्री बन्दीं नेपाःया आवश्यकताया आधारय् इलय् ब्यलय् कानुन संशोधन जुया वयाच्वंगु खँ नं लुमंकादिल । नेपाःया मुलुकी ऐन २०२० य् बलात्कार मुद्दाय् ३५ न्हुया हदम्याद तयातःगु व उकियात अप्वयेकाः खुला दयेकूगु व मुलुकी अपराध संहिताय् उकियात नं थपे यानाः २०७४ य् दछि याःगु खँ नं वय््कलं धयादिल ।

सपना प्रधान मल्लं दायर याःगु रिटय् सर्वोच्चं प्रतिपादन याःगु नजिर कथं प्यदँ न्ह्यः जक हदम्याद पुनर्विचार याःगु खँ नं मन्त्री बन्दीं कनादिल ।

सम्बन्धित बुखँ

LEAVE YOUR COMMENTS