
येँ (नेपालभाषा टाइम्स) – यातायात व्यवस्था ज्याकुथिं तत्काल न्हूगु सवारी चालक अनुमतिपत्र (लाइसेन्स)या निंतिं परीक्षा संचालन मयाइगु जूगु दु । स्वनिगःया यातायात व्यवस्था ज्याकुथिं अप्वया वनाच्वंगु कोरोना भाइरस (कोभिड-१९)या संक्रमणयात ध्यानय् तयाः परीक्षा संचालन मयायेगु धाःगु दु ।
यातायात व्यवस्था ज्याकू एकान्तकुनाया प्रमुख सम्बरबहादुर कार्कीं तत्कालया निंतिं न्हूगु अनुमतिपत्रया निंतिं परीक्षा संचालन यायेगु बारे छुं नं निर्णय मजूगु जानकारी बियादीगु दु । स्वनिगलय् कोरोना भाइरस संक्रमण न्यना वनाच्वंगु अवस्थाय् तत्कालया निंतिं न्हूगु अनुमतिपत्र कायेत परीक्षा संचालन यायेगु बारे छुं निर्णय मजूगु वय्कलं धयादीगु दु । यातायात व्यवस्था ज्याकुथिं सामान्य अवस्थाय् न्हूगु अनुमति पत्रया निंतिं परीक्षा संचालन यायेगु नापं पुलांगु नवीकरण यायेगु व अनुमतिपत्र वितरण यायेगु ज्या याना वयाच्वंगु खः ।
यातायातया ज्याकुथिं वंगु चैतनिसें हे न्हूगु अनुमतिपत्रया निंतिं परीक्षा संचालन याःगु मदुनि । सरकारं चैत महिनाय् लकडाउन यायेवं असार तक ज्याकू हे बन्द जुयाच्वंगु खः । असारनिसें ज्याकू चाःसां अनुमतिपत्र वितरण व नवीकरण यायेगु ज्या जक याःगु खः । अवस्था छुं भचा सामान्य जुल धाःसा हाकनं परीक्षा संचालन याये जुइ धासें वय्कलं सेवाग्राहीतय् आपालं हुल जुइगुलिं तत्काल परीक्षा संचालन मजुइगु स्पष्ट यानादिल ।
LEAVE YOUR COMMENTS