न्यादँ दतं नं गरिब म्हसिका पौ बीमफुनि
येँ – सरकारं गरिबतय् म्हसिका पौ बीगु धकाः ज्या सुरु याःगु थ्यंमथ्यं न्यादँ दयेधुंकूसां म्हसिका पौ धाःसा आःतकं बीफुगु मदुनि । सरकारं गरिबतय्त म्हसिकाः उमित म्हसिका पौ बीगु व उगु पौ दुपिंत सरकारपाखें थीथी सुविधा बीगु धकाः न्यादँ न्ह्यव हे ज्या सुरु याःगु खः ।
गरिब म्हसिकेगु जिम्मेवारी कयातःगु कृषि, भूमि व्यवस्था तथा सहकारी मन्त्रालयया अधिकारीतय्सं आवश्यक स्रोत साधन, जनशक्ति व गरिबी नियन्त्रण बारे स्पष्ट कार्ययोजना मदुगुलिं ज्या न्ह्याकेमफुगु खँ धाःगु दु । लिसें मन्त्रालयं वंगु दँय् जूगु थीथी निर्वाचनया कारणं नं ज्या लिबाःवंगु दावी यानाच्वंगु दु । अथेखःसां मन्त्रालयं वइगु खुला दुने नीखुगू जिल्ला व निदँ दुने देय्न्यंकं गरिब म्हसिकाः उमित म्हसिकापौ बीगु न्हूगु योजना पितबिउगु दु ।
आःतक याःगु अध्ययन कथं २६ गू जिल्लाया जक थ्यंमथ्यं प्यंगू लाख परिवारयात गरिब कथं म्हसिइकेधुंकूगु दु । उपिं मध्ये यक्व हे ल्याखं तसकं गरिबया धलखय् लाःगु खँ मन्त्रालयया अधिकारीतय्सं धाःगु दु । नेपाःया मुक्कं ५५ लाख परिवार मध्ये आःतक २६ गू जिल्लाया १२ लाख परिवारया अध्ययन जुइधुंकूगु दुसा ५१ गू जिल्लाय् अध्ययन हे सुरु मजूनि ।
गरिब म्हसिकेगु ज्या लिबानाच्वंगु खँ स्वीकार यासें कृषि, भूमि व्यवस्था तथा सहकारी मन्त्रालयया सचिव गोपीनाथ मैनालीं धयादीगु दु, ‘न्यादँ न्ह्यव ज्या सुरु जूगु खःसां गबलें योजना आयोगं नेतृत्व याइगु, गबलें समन्वय बोर्ड दयेकीगु, अले उकी पदाधिकारी मदइगु व लिपांगु इलय् चाहिँ चुनावं ज्या हे यायेमफुत ।
अथेहे म्हसिका पौ बीधुंकाः उमित छु छु सेवा सुविधा बीगु धयाःगु निं क्वःछिमाः धयागु खँ नं ज्या झन् झन् लिबाना वन ।’
न्हूगु सरकार वयेधुंकाः कृषि मन्त्रालयय् स्वाये यंकूगु गरिबी निवारण मन्त्रालय अन्तर्गत गठन यानातःगु गरिब घरपरिवार सहयोग समन्वय बोर्डं अति गरिब, गरिब व गरिबीपाखे न्ह्याः वनाच्वंपिं धकाः धलः दयेकूगु खः ।
वइगु निदँ दुने देय्न्यंकंया गरिब म्हसीका उमित आत्मनिर्भर व व्यावसायिक दयेकेगु ज्याझ्वः हयेगु खँ कृषिमन्त्री चक्रपाणी खनालं धयादीगु दु । वय्कलं धयादीगु दु, ‘खुला दुने म्हसिका पौ इनेगु ज्या सुरु जुइ व ल्यंदनिगु ५१गू जिल्लाय् गरिब म्हसीकाः निदँ दुने म्हसीकापौ बीगु ज्या न्ह्याइ ।
अथेहे थज्याःगु परिवारयात आत्मनिर्भर व व्यवसायी दयेकेत आवश्यक्ताय् आधारित त्यासाय् ब्याज अनुदान बीगु व किसान शिक्षाया विशेष कार्यक्रम हयेगु जुइ ।’ वय्कलं गरिब म्हसिकेधुंकाः उमित बीगु विशेष सरकारी सुविधा नं तोके यायेगु खँ धयादीगु दु । सरकारं खुलाया दुने गरिब म्हसिका पौ वितरण सुरु यायेगु धकाः विज्ञतय्सं धाःसा गरिब म्हसीकेगु सूचक हे वैज्ञानिक मजूगु खँ धाःगु दु ।
LEAVE YOUR COMMENTS