ख्वःर्हँय् महाद्यःया देगः शिलान्यास
ख्वप(नेपालभाषा टाइम्स)- ख्वप नगरपालिका ७ वडा ख्वः¥हँ (हनुमानघाट)य् महाद्यःया देगः पुनःनिर्माणया निंतिं शिलान्यास याःगु दु । ख्वप नगरपालिकाया प्रमुख सुनिल प्रजापतिं लोकेश्वर महाद्यःया देगः पुनःनिर्माणया निंतिं शिलान्यास यानादीगु खः ।
ज्याझ्वलय् नवासें नगर प्रमुख प्रजापति ख्वःर्हँ परिसर थनया जनताया निंतिं आस्थाया केन्द्रया रुपय् दुगु महत्वपूर्ण धार्मिक स्थल खः धयादिल । थुगु थाय्या सुधार नापं नियमित रुपं सुचुकुचु यायेगु, देगः पुनःनिर्माण, ताँ निर्माण यायेगु व सुधारयुक्त शवदाह गृह निर्माण यायेगु लगायतया ज्या निरन्तर रुपं संचालन जुयाच्वंगु जानकारी बियादिल ।
लिसें वय्कलं ख्वप देय् धार्मिक, सांस्कृतिक, प्राकृतिक, पुरातात्विक ल्यखं महत्वपूर्ण थाय् दुगु जिकिर यासें नगरपालिकां मूर्त व अमूर्त सम्पदा संरक्षणया ज्यायात प्राथमिकता बिया वयाच्वंगु दु धयादिल ।
वडा ७या अध्यक्ष उकेश कवां जीर्ण अवस्थाय् दुगु अज्याःगु सम्पदाया पुनःनिर्माण यायेगु क्रम न्ह्यानाच्वंगु दु धयादिल ।
ज्याझ्वलय् देगः पुनःनिर्माण समितिया अध्यक्ष बुद्धिराम दुवाल, दुजः जीवन राजोपाध्याय, वडा सदस्य हेरा ख्याजुं नं नुगःखँ तयादीगु खः ।
LEAVE YOUR COMMENTS