देय् दबूया संस्था संचालन तालिम क्वचाल

येँ(नेपालभाषा टाइम्स)-नेवाः देय् दबू कैलाली जिल्ला समितिया ग्वसालय् संस्था संचालन सम्बन्धी तालिम जूगु दु । देय् दबू कैलाली जिल्ला समितिया ग्वसालय् संस्था संचालन सम्बन्धी छन्हुया प्रदेशस्तरीय अभिमुखीकरण तालिम जूगु खः ।

धनगढी उपमहानगरपालिकाया रामजानकी द्यःया सभाहलय् जूगु तालिम समापनय् देय् दबूया केन्द्रीय न्वकु रश्मिला प्रजापति मूपाहांकथं झायादीगु खःसा देय् दबूया मेम्ह केन्द्रीय न्वकुलिसें सुदूरपश्चिम प्रदेश इन्चार्ज विकास श्रेष्ठ विशेष पाहांकथं झायादीगु खः ।

उगु तालिमय् देय् दबू सुदूरपश्चिम प्रदेश समितिया पदाधिकारीलिसें देय् दबूया कैलाली, कञ्चनपुर, डोटी, बझाङ, बैतडी, डडेल्धुरा जिल्ला समितिया पदाधिकारी नापं थीथी नगर समिति, सम्बद्ध खलः, पुचः, गुथिया पदाधिकारीपिंसं ब्वति कयादीगु खः । अथे हे उगु तालिमय् नेवाः मिसा दबू प्रदेश, जिल्ला व नगर समितिया पदाधिकारीपिंसं नं ब्वति कयादीगु खः ।

मूपाहांकथं झायादीम्ह प्रजापतिं संस्था संचालन यायेगु थीथी पक्षयात कयाः आधारभूत तालिम बियादीगु खःसा उगु इलय् नेवाः देय् दबूया साधारण दुजः इनेगु ज्या नं याःगु खः । साधारण दुजः इनेगु देय् दबूया अभियानयात निरन्तरता बीगु झ्वलय् प्रदेशया थीथी जिल्लाया नेवाःतय्त देय् दबूया साधारण दुजः दयेकेगु ज्या जूगु खः ।