ने. सं. ११४४ कौलाथ्व पारू - नःलास्वनेगु

मेट्रोया रञ्जना लिपि च्वज्या कासा

येँ – येँ महानगरपालिकां न्ह्याका वयाच्वंगु मेट्रो एफएम ९४.६ मेगाहर्जया २० क्वःगु बुन्हिया लसताय् जूगु रञ्जना लिपि च्वज्या धेंधेंबल्लाः कासा क्वचाल । थनया बसन्तपुली च्वंगु नव आदर्श मा.वि.इ जूगु लिपि च्वज्या कासाय् चय्न्हय्म्हेसिनं ब्वति काःगु खः । उगु लिपि च्वज्या कासाय् येँ, यल, ख्वप, तोखा, मनमय्जु, थसि, थेच्व, सक्व, थिमि, नैकाप आदि थासं ब्वति काःगु खः ।

येँ महानगरपालिका सूचना प्रविधि विभागया प्रमुख राज्यप्रकाश प्रधानांग लिपि च्वज्या कासाया न्ह्यसःपौ सार्वजनिक उलेज्या यानादीगु खः। लिपि च्वज्या कासाया उलेज्या यासें वय्कलं येँ महानगरपालिकां चालु आर्थिक दँय् काःगु भाषा, कला, संस्कृति व सम्पदाया संरक्षण यायेगु नीतिकथं हे थुकथंया लिपि च्वज्या कासा जुयाच्वंगु व एफएमया बुन्हिया लसताय् थुकथं नेपाःया म्हसीका जुयाच्वंगु लिपि च्वज्या कासा याये खंगुलिं थः तसकं लय्ताःगु धयादिल । लिसें वय्कलं थःपिंसं बिचाः यानागु स्वयां अप्वः कासामिपिंसं ब्वति काःगुलिं थ्व ज्याझ्वः सफल जूगु जक मखुसें लिपिया महत्व गुलि दु धइगु बारे नं स्पष्ट जू धयादिल ।

ज्याझ्वलय् लिपि कासाया निंतिं प्राविधिक ग्वाहालि याःगु नेपाल लिपि गुथिया न्वकु अनिल स्थापितं लिपिया महत्व व लिपि च्वयेबलय् ध्यान बीमाःगु पक्षयात कयाः ध्वाथुइकादीगु खः ।
लिपि च्वज्या कासाया निर्णायक मण्डलय् गुथिया प्राज्ञपिं राजेन्द्र शाक्य, मदनमुनि ंंवज्राचार्य व गुथिया न्वकु अनिल स्थापित च्वनादीगु दु । कासाय् उत्कृष्ट जूपिंत असोज १ गते जुइगु मेट्रो एमएमया बुन्हि कुन्हु सिरपाः लःल्हाइ ।

कासाय् न्हाप जूम्हेसित नीन्याद्वः, लिउयात झिंन्याद्वः, लियांलिउयात झिद्वः व झिम्हेसित हःपाःकथं म्हतिं द्वःछि द्वःछि तका व दसिपौ लःल्हाइ ।