संविधान संशोधन बहसपत्र तयारी कार्यदलं एमाले पिहांवल
येँ (नेपालभाषा टाइम्स) – नेपाल कम्युनिष्ट पाटी (एमालें) सरकारं नीस्वंगु ‘संविधान संशोधन बहसपत्र तयारी कार्यदलं’ थः प्रतिनिधियात औपचारिक रुपं लित सःतूगु दु । कार्यदलया कार्यशैली व दिशा प्रति असन्तुष्टि प्वंकूसें एमालेया प्रतिनिधि डा. भीम अधिकारीयात लित सःतेगु निर्णय याःगु खः । एमालेया महासचिव शंकर पोखरेलं कार्यदलया संयोजक लिसें प्रधानमन्त्री बालेन साहया राजनीतिक सल्लाहकार असिम शाहया नेतृत्वय् दयेकूगु समितियात पौ च्वयाः अधिकारीयात लित सःतेगु निर्णय यानागु जानकारी बिउगु दु ।
पोखरेलं कार्यदलयात च्वःगु पतिइ कार्यदलया ज्याखँ चित्त बुझे मजूगुलिं लित सःतेगु निर्णय जूगु खँ धयातःगु दु । कार्यदलया न्हापांनिसेंया गतिविधि सन्देहस्पद जूगु, संशोधन यायेगु विषययात स्पष्ट रुपं क्वःमछिउगु व वर्तमान संविधानया आधारभूत संरचनाप्रति सरकारया दृष्टिकोण स्पष्ट मजूगु द्वपं पतिइ बियातःगु । लिसें कार्यदलय् सहलहया निंतिं हःगु छुं छुं विषय संघीय लोकतान्त्रिक गणतन्त्रया मर्म अःखः जूगु ठहर नं एमालें याःगु दु ।
एमालें नीतिगत विषययात कयाः सरकारयाके स्पष्ट धापू फ्वंगु खःसां नं आः तकं आधिकारिक लिसः मवःगु खँ नं पतिइ न्ह्यथनातःगु दु । वर्तमान संविधानया आधारभूत विशेषतायात थप सुदृढ यायेगु व कार्यान्वयनया झ्वलय् खनेदुगु व्यावहारिक कमजोरी सुधार यायेगु उद्देश्यया निंतिं जक संविधान संशोधन जुइमाःगु अडान एमालेया दु ।
सरकारं थःगु सरोकारयात सम्बोधन मयाःगु व संशोधनया स्पष्ट मार्गचित्र महःगुलिं कार्यदलय् ब्वति कयाच्वनेगु औचित्य मदुगु धासें एमालें औपचारिक रुपं पिहां वयेगु निर्णय याःगु खः ।
थ्व स्वयां न्ह्यः मेगु स्वंगू राजनीतिक दलतय्सं नं कार्यदलया कार्यशैली व क्षेत्राधिकारयात कयाः गम्भीर न्ह्यसः थँसें आःया प्रक्रियाय् ब्वति मकायेगु धाये धुंकूगु दु ।
लोकतान्त्रिक समाजवादी पार्टी (लोसपा), जनता समाजवादी पार्टी (जसपा) व नेपाली कम्युनिष्ट पार्टी (नेकपा) या प्रतिनिधितय्सं कार्यदलया औचित्य व वैधताय् हे न्ह्यसः थंगु खः । उमिसं कार्यदलया संयोजकया नामय् पौ च्वयाः संविधानया मूल मर्म व भावना अःखः ज्या जुयाच्वंगु द्वपं नं बिउगु खः ।
कार्यदल नीस्वनेगु झ्वलय् गुंगू दलयात प्रतिनिधित्व याकेगु धाःगु खःसा नं आः कार्यदलय् राष्ट्रिय स्वतन्त्र पार्टी (रास्वपा) व राष्ट्रिय प्रजातन्त्र पार्टी (राप्रपा) या प्रतिनिधि जक ल्यं दनि । नेपाली कांग्रेसं धाःसा सुरुइ हे प्रतिनिधि मछ्वःगु खः ।
LEAVE YOUR COMMENTS