
हेटौंडा (नेपालभाषा टाइम्स)-बागमति प्रदेश सरकारं नेपालभाषा व तामाङ भाषायात सरकारी ज्याखँया भाषा कथं लागू याकेत हःगु भाषा सम्बन्धी कानुन कार्यान्वयन यायेगु विषयय् प्रदेशया मुख्यमन्त्री लिसें सम्बन्धित मन्त्री व थीथी मन्त्रालयया सचिवतलिसे सहलह ज्याझ्वः जुल । भाषा आयोगया ग्वसाः कथं मुख्यमन्त्रीया ज्याकुथिइ उगु ज्याझ्वः जूगु खः ।
ज्याझ्वलय् थःगु बिचाः तयेगु झ्वलय् मुख्यमन्त्री बहादुर सिंह तामाङं भाषा सम्बन्धी कानुनयात आः तत्काल हे कार्यान्वयन याना छ्वयेगु व उकी छुं सुधार यायेमाःगु दुसा लिपा यायां वनेगु खँ कनादिल । अथे हे वय्कलं कानुन कार्यान्वयनया लागिं प्रदेश सरकारं गठन याःगु कार्यदलं बिउगु प्रतिवेदन अध्ययन यानाच्वनागु व उकियात तुरुन्त हे कार्यान्वयन यायेगु जुइ धयादिल ।
प्रदेशया संस्कृति, पर्यटन तथा सहकारी मन्त्री विमल ठकुरीं कार्यदलया प्रतिवेदन याकनं हे लागू याकेगु बचं बिसें छुं भचा लिबात धायेवं तुं आँते मचायेत इनाप यानादिल ।
पुलांम्ह संस्कृति मन्त्री शैलेन्द्रमान वज्राचार्यं संसदं थ्व कानुन पारित जुइधुंकाः १८० न्हु लिपा थुकियात कार्यान्वयन यायेगु लागिं जूगु थीथी ज्याखँ बारे थःगु अनुभव कनादिल ।
सभापतिया थासं न्ववासें भाषा आयोगया अध्यक्ष डा. गोपाल ठाकुरं बागमति प्रदेशपाखें न्ह्याकेत्यंगु थ्व कानुनया कार्यान्वयनपाखें देय्या मेमेगु प्रदेशतय्त नं प्रेरित याये फइ धकाः विश्वास प्वंकादिल । वय्कलं शिक्षा व न्याय क्षेत्रय् बहुभाषिक संस्कृति आरम्भ यायेमाःगु खँय् नं बः बियादिल ।
नेवाः देय् दबूया न्वकु उमेश स्थापितं प्रदेशया बजेट वःगु स्वला दयेधुंकल, उकिं आः याकनं हे थ्व कानुन कार्यान्वयनया लागिं फ्यानातःगु बजेट निकासा यानाः ज्या न्ह्याके माल धकाः इनाप यानादिल । देय् दबू बागमति प्रदेशया नायः बिष्णुगोपाल महर्जनं बागमति प्रदेश सरकारया लेटर हेडय् नेपाल संवत् नं छ्यलेत इनाप यानादिल । तामाङ घेदुङया उपमहासचिव सरोजमोहन लामां प्रदेश सरकारया लेटरहेडय् तामाङ व नेवाः लिपि छ्यला यंकेमाःगु खँय् बः बियादिल ।
भाषा आयोगया दुजः सुरेश मानन्धरं लसकुस यासें न्ह्याकूगु उगु ज्याझ्वलय् आयोगया का.मु. सचिव डा. लोकबहादुर लोप्चनं कार्यदलपाखें तयार याःगु प्रतिवेदनय् न्ह्यथनातःगु विवरणया जानकारी याकादीगु खःसा मुख्यमन्त्री कार्यालयया प्रदेश सचिव नापं संस्कृति मन्त्रालय, सामाजिक विकास मन्त्रालय, प्रदेशसभा, आन्तरिक मन्त्रालयया सचिवतय्सं नं थ्व सवालय् जुयाच्वंगु ज्याखँ बारे जानकारी बियादीगु खः ।
LEAVE YOUR COMMENTS