अभिभावकपाखें स्वास्थ्य मन्त्रालय घेराउ

येँ – ‘कोरोना भाइरस न्यना वनेवं चीनं खुन्हुया दुने द्वःछिम्ह विरामी वासः याइगु अस्पताल हे दयेके धुंकल तर नेपालं धाःसा आः तक चीनं लिहां वइपिं नेपाःमितय्त तयेगु थाय् छकू तकं लुइके मफुनि ।’ प्रधानमन्त्री केपी ओलीं बय् पुयाच्वंगु किपा सार्वजनिक जुइवं चीनया वुहानय् च्वंपिं नेपाःमितय्सं प्रमया नामय् छ्वया हःगु पती च्वयातःगु खँ खः थ्व ।

वुहानय् च्वंपिं नेपाःमितय्त लित हयेगु लागिं पहल मयाः धासें म्हिगः उमि अभिभावकतय्सं येँय् स्वास्थ्य मन्त्रालय समेत घेराउ यात । थः मस्तय्त याकनं लित हया बी माल धइगु माग यासें मन्त्रालय वंपिं अभिभावकतय्त स्वास्थ्य मन्त्री भानुभक्त ढकालं नाप तकं लाः मवयेवं अभिभावकत निराश जुयाः लिहां वःगु खः ।

वुहानय् च्वंपिं नेपाःमितय्सं छेँय् लिहां वने माल धकाः इनाप यानाच्वनं तकं उमित लित हयेगु ज्या मयात धासें अभिभावकत आक्रोशित जूगु खः । सरकारं धाःसा अनं लित हःपिं नेपाःमितय्त १४ न्हु तक अलग्ग तयाः परीक्षण याये माःगु जूगुलिं तयेगु थाय् मदयाः लित महसे च्वनाच्वंगु खः ।

म्हिगः तिनि बल्ल प्रधानमन्त्री केपी ओलीं उमित स्वनिगःया प्यंगू थासय् तयेगु धकाः निर्देशन बियादीगु दु । उमित आः शिवपुरीस्थित नेपाली सेनाया तालिम केन्द्र, इचंगुइ सुकुम्बासीतय् लागिं दयेकातःगु खालीगु अपार्टमेन्ट, सूर्यविनायकया कृषि तालिम केन्द्र व खरिपाटीया विद्युत प्राधिकरणया तालिम केन्द्रय् तयेगु व्यवस्था जूगु दु । खरिपाटीया स्थानीय मनूतय्सं धाःसा वस्तीया दथुइ उमित तये हये दइ मखु धकाः विरोध प्रदर्शन याःगु दु ।