पद्मवर्ण विहारय् भगवान बुद्धया अस्थिधातु

यल – वल्र्ड एलायन्स अफ बुद्धिष्ट नांया संस्थां नेपाःयात उपहारकथं भगवान बुद्धया पवित्र अस्थिधातु लःल्हाःगु दु । नेपाःयात लःल्हाःगु भगवान बुद्धया उगु अस्थिधातु थनया श्री पद्मवर्ण विहारय् प्रतिस्थापन याःगु दु ।

नेपाःपाखें प्रतिनिधित्व यानादीम्ह युवक बौद्ध मण्डल, नेपालया पुलांम्ह नायःलिसे प्रदेश नं. ३ या सांसद शोभा शाक्ययात वल्र्ड एलायन्स अफ बुद्धिष्ट संस्थां पवित्र अस्थिधातु लःल्हाःगु खः । प्रदेश सांसद शाक्यं उगु अस्थिधातु पद्मवर्ण विहारय् प्रतिस्पथापन यानादीगु खः ।

विश्वया पीगू देय्या बौद्ध धर्मावलम्बितय् मंकाःगु संगठन वल्र्ड एलायन्स अफ बुद्धिष्टं थ्व स्वयां नं निक्वःतक भगवान बुद्धया पवित्र अस्थिधातु उपहारकथं लःल्हाःगु प्रदेश सांसद शाक्यं ‘नेपालभाषा टाइम्स’ यात जानकारी बियादिल । वय्कलं बियादीगु जानकारीकथं उगु संस्थापाखें न्हापांखुसी प्राप्त जूगु अस्थिधातु यलया हे सुमंगल विहारय् प्रतिस्थापन यायेगु ज्या जूगु खः ।

दकलय् न्हापां थाइल्याण्डपाखें झिगू देय्यात व निक्वःखुसी म्यानमारपाखें नं झिगू हे देय्यात अस्थिधातु उपहारकथं बिउगु खःसा स्वक्वःखुसी निगू देय्यात जक बिउगुलिइ नेपाःयात नं बिउगु प्रदेश सांसद शाक्यं जानकारी बियादिल ।

उपहारकथं प्राप्त जूगु भगवान बुद्धया अस्थिधातु पद्मवर्ण विहारय् प्रतिस्थापन याये न्ह्यः छगू शोभायात्रा याःगु खः । सांसद शाक्यया सौगःस्थित छेँनिसें न्ह्याःगु शोभायात्रा हौगः, मंगः, नुगः त्वाः, ओकुबहाः जुयाः ज्याथाबहाःस्थित विहारय् यंकाः प्रतिस्थापन याःगु खः ।

सम्बन्धित बुखँ

LEAVE YOUR COMMENTS