तातोपानी चायेकूसां व्यापार शून्य

केरुङ नाकाय् नं लँ स्यंगुलिं मोहनियात सामान हयेत थाकु

येँ – चीनं नेपाः लिसे स्वानाच्वंगु तातोपानी नाका चायेकूसां उगु नाकां सामान हयेगु ज्या धाःसा अझं न्ह्याये मफुगुनिगु खँ सम्बद्ध व्यापारीतय्सं धाःगु दु । भुखाय् ब्वयेधुंकाः बन्द याना तःगु उगु नाका चायेकेगु लागिं नेपालं यक्व इनाप यायेवं चीनं नाका शुरु याःगु खः । तर नाका चायेकूसां चीनं थीथी कथंया नियम लागू याना तःगुलिं अनं सामान हयेत तकं थाकुयाच्वंगु खँ नेपाली व्यापारीतय्सं धायेगु यानाच्वंगु दु ।

लिसें तातोपानीं येँय् वयेगु लँ आः तक मदयेकूगुलिं गाडी चले यायेत नं थाकुयाच्वंगु खँ धाःगु दु । नेपाःपाखेया लँ दयेकेगु लागिं तकं नेपाः सरकारं खास ध्यान मबिउगु द्वपं नं व्यापारीतय्सं बिउगु दु । चीनं नाका चायेकूसां सामान हयेत थाकुगु जुयाः तातोपानी लागा अझं गुलजार मजूगु खँ धाःगु दु ।

थौंकन्हय् अनं फाट्टफुट्ट जक गाडी चले जूसां गबलें गबलें ला छगः हे गाडी मवइगु खँ नं धाःगु दु । उखे चीनं आः नेपाः दुहां वनेगु मूल नाकाया रुपय् विकास यायेत्यंगु केरुङ नं बांलाक सञ्चालन याये मफयाच्वंगु खँ धाःगु दु । केरुङं नेपाः दुहां वयेगु राजमार्ग तसकं स्यंगु व थ्व दयेकेगुपाखे नेपाः सरकारं खास हे ध्यान मबिउगु जुयाः अनं सामान हयेत थाकुयाच्वंगु खँ नं व्यवसायीतय्सं धाःगु दु ।

चीनं नेपाः वयेगु निगुलिं नाकाय् छखे लँ बांमलाःगु व मेखे चीनं लागू यानातःगु थीथी कथंया नियमं यानाः सामान हयेत थाकुगुलिं थुगुसी मोहनिया लागिं चीनपाखें प्रशस्त मात्राय् न्हूगु सामान हये मखनीगु खँ नं व्यापारीतय्सं धाःगु दु । थुकिं यानाः मोहनियात न्हूगु सामान मथ्यनीगु व दुगु सामानया भाः नं थहां वने फुगु अनुमान नं याःगु दु ।

उत्तर कोरियायात व्यवसाय दिकेत पौ
नेपाः सरकारं उत्तर कोरियालीतय्सं नेपालय् चले यानाच्वंगु गुंगू व्यवसाय बन्द यायेत निर्देशन बिउगु दु । भदौया स्वंगूगु वाःनिसे लागू जुइकथं निलाया दुने थःपिनि व्यवसाय बन्द यायेत वा मियाः नेपाः त्वःता वनेत परराष्ट्र मन्त्रालयं पत्राचार याःगु खँ उद्योग विभागं धाःगु दु । संयुक्त राष्ट्र संघं उत्तर कोरियायात प्रतिबन्ध तःगु कारणं नेपालं नं उत्तर कोरियाली लगानी लित छ्वयेगु ज्या न्ह्याकूगु खः ।

विभागया कथं लगानी लित यंकेत नेपाःस्थित कोरियाली दूतावासयात तःक्वः इनाप याःगु व निक्वः तक दूतावासया डीसीएम किम जोङलिसे मौखिक समझदारी नं जूगु खः । तर कार्यान्वयन मजुइवं परराष्ट्र मन्त्रालयं व्यवसाय यानाच्वंपिं उत्तर कोरियाली नागरिकया भिसा तकं नवीकरण मयाःगु खः ।विभागया कथं उत्तर कोरियाली नागरिकतय्सं नेपालय् अस्पताल, रेष्टुरेण्ट व सफ्टवेयर निर्माणया ज्याय् लगानी यानातःगु दु ।

सम्बन्धित बुखँ

LEAVE YOUR COMMENTS