ट्वीटरया संस्थापकपाखें थःगु सम्पत्तिया २८ प्रतिशत ग्वाहालि

येँ – विश्वन्यंक महामारी जुयाच्वंगु कोरोना भाइरस (कोभिड-१९) विरुद्ध ल्वायेगु निंतिं ट्वीटरया संस्थापक ज्याक डोर्सीं थःगु सम्पत्तिया २८ प्रतिशत ग्वाहालि याइगु जूगु दु ।

सामाजिक सञ्जाल ट्वीटरया संस्थापक डोर्सीं छगू अर्ब अमेरिकी डलर ‘ग्लोवल कोभिड-१९ रिलिफ फण्ड’यात बीगु जानकारी बियादीगु खः । उगु ग्वाहालि ‘स्टार्ट स्मल फाउण्डेशन’ पाखें तप्यंक जुइ । डिजिटिल प्लाटफर्म स्क्वायर थज्याःगु कम्पनीया सीईओ नं जुयादीम्ह डोर्सीं थःम्ह यानागु ग्वाहालियात पारदर्शी दयेकेगु धयादिल ।

थ्व इलय् ग्वाहालि तसकं आवश्यक व जरुरी जूगु धासें ४३दँया डोर्सीं थुकीं मेपिन्त नं ग्वाहालि यायेत प्रेरणा दइगु विश्वास प्वंकादिल । वय्कलं जीवन तसकं चीहाकःगुलिं मनूतय् निंतिं झीसं फुचागु थौं हे यायेमाःगु बिचाः नं तयादी ।