‘भारत–पाकिस्तान दथुइ झन्डै परमाणु युद्ध जुइत्यंगु’

एजेन्सी÷ अमेरिकाया पुलांम्ह विदेशमन्त्री माइक पोम्पिओं सन् २०१९ य् भारत व पाकिस्तान दथुइ झन्डै परमाणु युद्ध जुइत्यंगु दावी याःगु दु । थःगु संस्मरण सफू ‘नेभर गिभ एन इन्च ः फाइटिङ फर दि अमेरिका आइ लभ’य् पोम्पिओं धयातःगु दु, ‘सन् २०१९या फेब्रअरी महिनाय् भारत व पाकिस्तान दथुइ परमाणु युद्धया निंतिं गज्याःगु तकया अवस्था थ्यनेधुंकूगु धयागु खँ मेपिं सिउथें जितः मताः ।’
’सत्य छु धाःसा गुलि सतिक थ्यन धयागु जिं नं थ्याक्क हे मसिउ, तर जिं थ्व सिउ कि तसकं सतिक थ्यनेधुंकूगु खः ।’

हनोई छगू शिखर वार्ताया इलय् उत्तर कोरियाया प्रतिनिधितलिसे परमाणुअस्त्र बारे वार्ता जुयाच्वंगु चान्हय् भारत व पाकिस्तानं कश्मिरया विषयय् थःथवय् ख्याच्वः बिइगु सुरु याःगु थःम्हं गुबलें ल्वःमंके मफइगु खँ पोम्पिओं सफुलिइ न्ह्यथनातःगु दु ।

उबलय् भारत प्रशासित कश्मिरय् भारतीय सुरक्षाकर्मीतय्त हिंस्रक आक्रमण जुइवं दिल्लीं पाकिस्तानया भूभागय् हवाई आक्रमण सुरु यात । थ्व लिपा ब्वलंगु तनाव दथुइ परमाणु अस्त्र छ्यलीगु जोखिम तच्वया वःगु खः ।

उबलय् पृथकतावादी लडाकुतय्सं आक्रमण यानाः भारतया पीम्हं मल्याक सैनिकतय्त स्यानाबिउगु खः । थुकियात पोम्पिओं ‘सम्भवतः पाकिस्तानया प्रतिआतंकवादसम्बन्धी कमजोर नीतिया कारणं सम्भव जूगु छगू इस्लामिक आतंकवादी आक्रमण’ धाःगु दु ।

पोम्पिओं सफुलिइ न्ह्यथनातःकथं हनोई द्यनाच्वंगु इलय् छम्ह भारतीय समकक्षीलिसे खँ ल्हाये माल धकाः थंवल । वं पाकिस्तानीतय्सं कयेकेगु निंतिं थःपिनि परमाणुअस्त्र तयार यानाच्वंगु दु धयागु थःपिंत ताःगु व थःपिंसं नं थुकिया बारे बिचाः यानाच्वनागु खँ कन ।

पोम्पिओं उबलय् आःयात छुं यायेमतेनि, खँ मिले यायेत छुं ई बीत इनाप यात । पोम्पिओं अबलय् थःलिसें दुम्ह तात्कालिन अमेरिकी राष्ट्रिय सुरक्षा सल्हाकार जोन बोल्टनलिसे सहलह यात, अले तुरुन्त पाकिस्तानी सेना प्रमुख जनरल कमद जावेद बाज्वायात स्वापू तयाः भारतीय पक्षं धाःगु खँ कन । उबलय् पाकिस्तानी सेनाप्रमुखं थःपिंसं परमाणु अस्त्र छ्यलेत्यन धयागु खँय् सत्यता मदुगु बरु भारतं थःगु परमाणु अस्त्र परिचालन यायेत तयार यानाच्वंगु धयागु थःपिंत जानकारी वःगु धयागु खँ कंगु पोम्पिओं सफुलिइ न्ह्यथनातःगु दु ।

‘दिल्ली व इस्लामाबादय् च्वंपिं अमेरिकी पुचलं बांलाक ज्या याःगुलिं छुं घौ दुने निगुलिं पक्षयात परमाणु युद्धया तयारी याना च्वंगु मदु धयागु खँय् विश्वस्त यायेफत’ पोम्पिओं धयातःगु दु । अथेहे वय्कलं उबलय् ग्यानापुगु लिच्वः वयेके मबिइत थःपिंसं गुगु ज्या याना व मेमेगु देशं यायेमफइगु खँ नं सफुलिइ धयातःगु दु ।

पोम्पिओं थःगु सफुलिइ यानातःगु दावीयात धाःसा भारत व पाकिस्तान निगुलिं पक्षं छुं प्रतिक्रिया बिउगु मदुनि । पोम्पिओ उबलय् राष्ट्रपति डोनाल्ड ट्रम्पया क्याबिनेटय् विदेशमन्त्री जुयाच्वंगु खः ।